L’esperàvem en novembre mas l’avèm pas agut abans febrièr. Fin finala es aparegut lo primièr disc d’Alidé Sans entitolat Eth paradís ei en tu. La musiciana aranesa presentèt aquel primièr trabalh dimenge passat a Barcelona dins l’encastre del festenal Barnasants. L’album rebat de situacions de la vida vidanta que nos menan a perpensar sus las nòstras vidas segon lo vam e l’ingenuitat d’una jove occitana de vint ans.
 
Totas las cançons de l’album, mens una, son de composicions pròprias interpretadas amb fòrça e vam, amb de ritmes que remembran de còps lo reggae, la rumba o lo soul, dins un estil que la cantaira gausa pas definir pr’amor qu’es solament “quauquarren que me ges de laguens”, segon çò qu’a declarat a Barcelona TV.
 
Una cançon del disc es tradicionala, se tracta d’una version fòrça personala dels Caulets, segon sa version aranesa. Aquel tèma, la cantaira l’a enregistrat amb la collaboracion de qualques escolans d’occitan de l’Isla de Baish (Savés) que son: Sophie Monteil (piano), Lisa Fraresso (flaüta traversièra), Edith Seguier (percussions), Anaïs Gaux (votz) e Antoine Finos (bassa).



Barcelona TV - #aranésòc