Dins l’acte de sosten a Charlie Hebdo i aviá l’ambaissador francés e lo caricaturista suedés Lars Vilks, menaçat de mòrt per aver publicat qualques caricaturas de Maomet en 2007. Un segond atac se faguèt contra una sinagòga. La polícia a trobat e tuat un presumit terrorista.

Almens un mòrt e tres policièrs ferits es lo bilanç d’una primièra fusilhada que se debanèt ièr a l’exterior d’un centre cultural de Copenaga (Danemarc) que s’i debanava un acte de sosten al setmanièr satiric francés Charlie Hebdo. Dedins, en participant a l’eveniment, i aviá l’ambaissador francés, François Zimeray, qu’anoncièt sul pic sus Twitter qu’èra salve. I aviá tanben lo caricaturista suedés Lars Vilks, qu’èra menaçat de mòrt per qualques caricaturas de Maomet qu’aviá publicadas en 2007. Es fòrça probable que Vilks foguèsse la tòca de l’atac. Segon çò que raportèron sul pic qualques mèdias locals, un òme d’aperaquí 40 ans, assistent de l’eveniment, moriguèt. La fenèstra del local aviá almens 40 traucs faches per las balas.
 
L’eveniment èra un debat entitolat Art, blasfèmi e libertat d’expression, que se celebrava en seguida dels atemptats jihadistas del mes passat a París.
 
Los autors de l’atemptat serián dos òmes, abilhats de negre, que parlavan danés e que fugiguèron en una veitura trobada abandonada pus tard, pas tròp luenh. La polícia, qu’es a recercar los suspèctes, a recomandat als ciutadans d’establir pas cap de contacte amb eles.
 
Lo govèrn francés reagiguèt còp sec en publicant un comunicat que condemna l’atac e que mòstra la solidaritat de l’estat francés amb Danemarc. Lo ministre francés de l’interior, Bernard Cazeneuve, anoncièt que se desplaçariá sus plaça per sosténer las autoritats danesas.


Atac contra una sinagòga
 
Qualques oras puèi, se debanèt una autra fusilhada dins la meteissa vila, en tocant una sinagòga. Un jovenòme que gardava la sinagòga foguèt tocat al cap e ne moriguèt puèi; e dos policièrs de mai foguèron ferits. Segon la television danesa TV2, lo tiraire fugiguèt a pè e l’estacion de mètro Norreport foguèt evacuada sul pic. Pus tard, la polícia tuèt un òme sospechat d'èsser l’autor dels dos atacs.


#copenhagen tuits