Se ten l’alta al fuòc que comencèt aquesta dimenjada en Ucraïna, mas d’un biais fragil e encara s’es raportat qualques atacs isolats. E las previsions son pas gaire optimistas. L’acòrdi es similar al que se fixèt en setembre passat, e que s’implementèt pas, e donc lo cap de la Republica Populara de Donetzk a dich que s’aqueste acòrdi novèl fonciona pas, n’i aurà pas cap d’autre, çò rapòrta Nationalia.

Segon l’acòrdi signat a Minsk dijòus passat —e que lo Cremlin l’a publicat—,lo Parlament d’Ucraïna deurà aprovar abans un mes una resolucion sus un autogovèrn parcial de las zònas de Donetzk e Luhansk, e se començarà un procès de negociacion per reformar la constitucion d’Ucraïna abans la fin de 2015. Aquela reforma se deu basar sus la descentralizacion de l’estat ucraïnés e deu comprene un estatut especial per Donetzk e Luhansk. En aquel moment l’estat ucraïnés poirà reprene lo contraròtle de la frontièra amb Russia. Per Kyiiv, aquò es fondamental: los ucraïneses acusan los russes de provesir las milícias de Donetzk e Luhansk amb d’armas e de soldats.
 
Mas lo cap executiu de la Republica Populara de Donetzk, Oleksandr Zakharchenko, declarèt a Sputniknews qu’encara i a de ponches en espèra d’acòrdi, coma per exemple quala serà la forma concreta que prendrà l’autogovèrn definitiu de Donetzk e Luhansk. En mai d’aquò Zakharchenko a assegurat que s’aquel acòrdi novèl es violat per Ucraïna, n’i aurà pas cap d’autre.
 
De son costat, lo president d’Ucraïna, Petro Poroshenko, a dich mai d’un còp qu’el es pas dispausat a reconéisser las republicas popularas de Donetzk e Luhansk, e mai s’es dobèrt a concedir d’estatuts especials als dos territòris.
 
 
L’orientacion d’Ucraïna en politica exteriora
 
Nationalia tanben remembra qu’una autra question restacada a aquel conflicte es lo ròtle que prendrà Ucraïna en politica exteriora. L’actual govèrn es partisan d’intrar dins l’Union Europèa e l’OTAN, çò que Russia refusa completament. Vaquí l’origina del conflicte.
 
Mai d’un analista soslinhan que i aurà dificilament la patz a Donetzk e Luhansk s’abans i a pas un acòrdi sus l’orientacion de la politica exteriora d’Ucraïna. Una opcion que Russia acceptariá plan es qu’Ucraïna foguèsse, coma fins ara, un estat tap entre la frontièra orientala de l’Union Europèa e lo limit occidental de Russia.