Un grop d'associacions berbèras de Rif an escrich una letra el rei d’Espanha, Felip VI, per li demandar de “reparacions pels prejudicis passats o presents causats per la guèrra quimica”, una guèrra qu’Espanha menèt contra las populacions de las montanhas del nòrd de Marròc que se levèron contra lo colonialisme espanhòl e francés.
 
Segon lo president del Congrès Mondial Amazigh, Rashid Raha, la letra es fruch d’una amassada de divèrsas associacions berberistas dissabte passat a Nador (Rif). Dins aquela amassada analisèron los atacs quimics d’Espanha contra la populacion entre 1921 e 1926, e las consequéncias sus la santat dels ciutadans.
 
Segon Raha, lo 80% dels càncers que se tractan a l’ora d’ara dins l’Espital Avicènna de Rabat, lo mai grand de Marròc, venon de Rif, e es fòrça probable que los pacients ajan eiretat de problèmas de santat derivats dels gases emplegats per Espanha dins aquela guèrra. S’agiriá de gas mostarda, de fosgèn, de disfosgèn e de cloropicrina.
 
Los signataris de la letra considèran que l’estat espanhòl “a un deute istoric amb Rif”, e pr’amor d’aquò dison al rei Felip VI que pòt pas “restar insensible davant l’injustícia, la violacion dels dreches mai elementaris e los prejudicis subits per las populacions civilas sens defensa”. La letra prepausa al rei una “reparacion amistosa” amb d’accions de reconeissença oficiala de la responsabilitat, d’organizar d’actes de reconciliacion e de revisar l’istoriografia espanhòla. Tanben prepausa de “compensacions economicas individualas” e collectivas, per tal de finançar d’unitats d’oncologia als espitals de Rif e las recèrcas sus aquel periòde de l’istòria.