De defensors del Cevenòl, la linha de tren que va de Clarmont-Ferrand a Marselha, se rassemblèron ièr totes desguisats davant la gendarmariá de Ginolhac (Cevenas), en sosten a Claude Magnien, convocat dins la casèrna en seguida d’una denóncia que l’SNCF a facha contra el per “entrava a la liura circulacion dels trens”, segon çò que publiquèt Objectif Gard.
 
E mai se la convocacion de Magnien foguèt resportada, l’acamp foguèt tota una fèsta ciutadana. En profechant qu’aquel jorn èra Carnaval a Ginolhac, los manifestants cridèron a se rassemblar “desguisats, amb los pròches, amics, cans, gats, canaris, etcetèra”. La matinada foguèt animada per de musica e de crespèls.
 
Magnien es lo president del Comitat de Defensa dels Usatgièrs e dels Servicis Publics en las Nautas Cevenas, e deu respondre davant la justícia per aquela denóncia de la societat francesa dels camins de fèrre.
 
La linha de tren que travèrsa las Cevenas patís una degradacion qu’inquieta lo mond. Los defensors del Cevenòl sospièchan que se pren de mesuras per far venir la linha “indesirabla”. O fa pensar la supression de trens, l’abandonament de la mantenença, l’organizacion troncada dels oraris de correspondéncias, o encara la “supression grèva de la continuitat del tren fins a Marselha”, segon çò que diguèt Guy Vissac, conselhièr general del canton de Lanjac e conselhièr regional d’Auvèrnhe.

---

Se'n parlèt a l'emission locala de France 3.