Lo 27 de setembre que ven i a aurà l’eleccion al Parlament de Catalonha, que lo president de la Generalitat anoncièt coma una eleccion plebiscitària. Los partits independentistas metràn la tòca de l’independéncia dins lo programa, per fin qu’aquel vòte venga un referendum per l’independéncia.
 
Dimars passat, lo president de la Generalitat de Catalonha anoncièt que los sèt meses que rèstan fins a aquel vòte devon servir per metre en marcha d’estructuras d’estat e preparar la desconnexion d’Espanha, segon çò que rapòrta l’ACN. Tres de las intencions principalas del govèrn catalan son lo desplegament d’un servici d’impòstes e finanças, lo refortiment de l’accion exteriora de la Generalitat e l’elaboracion d’un plan d’infrastructuras estrategicas. La tòca: “o daissar tot prèst en cas qu’arribe una desconnexion legala amb la rèsta de l’estat”.
 
Tanben anoncièt l’elaboracion d’un sistèma de proteccion e de responsa tocant las installacions estrategicas: de rets, de sistèmas e d’esquipaments fisics essencials que los caldrà aver contrarotlats al moment de la desconnexion amb l’estat espanhòl. Aquò compren lo provesiment d’aiga, las infrastructuras energeticas de tota sòrta, los pòrts, los aeropòrts, los camins de fèrre e los sistèmas de telecomunicacion.