Es un curiós eveniment que se debanèt a Montpelhièr lo 28 de junh passat.

Lo C.A.L.R. (Conselh Academic per las Lengas Regionalas) èra per s'acampar aquel jorn. Es una entitat que se compausa de professors d'occitan e de catalan, d'administrators del rectorat, de representants del Conselh Regional de Lengadòc-Rosselhon e de parents d'escolans. La tòca d'aqueste conselh es de s'assegurar del bon foncionament de la convencion de desvolopament de l'ensenhament de l'occitan e del catalan (passada entre l'estat francés e lo Conselh Regional).

Ongan aquesta acampada èra per se passar dins un contèxte d'agression permanenta fàcia a l'ensenhament de l'occitan: supression d'un emplec de conselhièr pedagogic (qu'existís dempuèi 1982) e non remplaçament d'emplecs d'animators pedagogics dins los departaments d'Aude e de Gard que se'n van a la retirada.

L'acampada comencèt jos la presidéncia d'en Christian Philip, lo rector de l'Acadèmia. Rapidament, lo representant del Conselh Regional l'acusèt de non pas far respectar las obligacions de la convencion. Puèi lo representant del C.R.E.O. (Centre Regional d'Ensenhament de l'Occitan) li demandèt explicas a prepaus de las supressions d'emplecs.
 
Coma volguèt pas respondre, a motiu que lo C.A.L.R. èra pas una amassada sindicala, lo rector d'acadèmia Philip clavèt sulpic la sesilha, se levèt e se'n anèt en daissar los partecipants sols a l'entorn de la taula!

Christian Philip es conegut per èsser un rector d'académia "politic". Foguèt deputat de l'U.M.P. lo partit de drecha de l'ex-president Sarkozy. Foguèt tanben director del cabinet de l'ex-primièr ministre François Fillon. Lo president Sarkozy lo nomentèt coma representant personal a l'organizacion de la Francofonia. Es doncas un òme que sas conviccions politicas lo ligan a un partit opausat a la signatura de la Carta Europèa per las Lengas Minoritàrias. Se cal pas estonar que se mene una politica desfavorabla a l'ensenhament de las lengas nòstras, malgrat que faga un exercici d'auto-satisfaccion per letra que non engana pas degun. Se cal pas estonar tanpauc d'aqueste movement de nèrvis: aquesta tentativa mancada de voler far un pam de nas teatral als actors de l'ensenhament de l'occitan e del catalan es una pròva del mesprètz de l'estat malgrat qualques mesuretas purament cosmeticas.

Una peticion es lançada per far pression sul rectorat per que s'arrèste lo desmargament de l'ensenhament de las nòstras lengas.