Lo jornalista israelian Zvika Klein a publicat un vidèo qu’amassa, en mens de 100 segondas, l’experiéncia de caminar 10 oras per las carrièras de París abilhat coma un josieu. S’es inspirat del format 10 oras... qu’a ben capitat sus YouTube ont apareguèt per lo primièr còp, en octòbre d’arunan, amb un vidèo que mòstra lo secutament que subís una femna quand se passeja per carrièras.
 
En aquel vidèo, Klein respond a la question seguenta: “Las personas josievas se pòdon passejar en patz per las carrièras de París?” Dins l’enregistrament, lo jornalista se met una quipà sul cap davant la Tor Eiffel e comença de se passejar per las carrièras de la vila francesa. Es insultat plusors còps, de mond li demandan s’es josieu, e se fa quitament escopir dessús. Un dels passants l’incrèpa quitament en disent que Palestina viurà, en identificant las personas josievas amb la politica de l’estat israelian.
 
Al delà de çò que pòsca demostrar aqueste vidèo, segon los servicis de proteccion de la comunautat josieva, en 2014 se debanèron 850 atacs antisemitas dins tot l’estat francés. Çò es, mai del doble qu’en 2013. En mai d’aquò, qualques jorns après los faches de Charlie Hebdo, lo president del Conselh Representatiu de las Institucions Josievas de França (CRIF), Roger Cukierman, exigissiá al president francés François Hollande de mesuras “seriosas e fòrtas” per protegir la comunitat josieva —çò es, mai de 500 000 personas dins tot l’estat francés— en tot comprene que lo país viu “una situacion de guèrra”. Cukierman assegurèt tanben qu’a causa del redoblament dels atacs antisemitas d’aquestes darrièrs tempses, fòrça membres de la comunautat josieva an decidit de quitar França.