Mila tres cents musulmans, segon la polícia norvegiana, envoutèron dissabte de ser la sinagòga d’Òslo per protegir los josieus de la vila durant l’acte religiós de la fin del Sabat. La rampelada, espontanèa, èra nascuda dins los rets socials coma reaccion a l’atemptat contra la sinagòga de Copenaga, ara fa una setmana. Los musulmans, qu’entre eles i aviá fòrça femnas e joves, cridèron contra l’antisemitisme puèi escotèron en silenci la ceremònia religiosa josieva, que se faguèt a aquela ocasion a las pòrtas de l’edifici. Lo lidèr de la comunautat josieva de Norvègia, Ervin Kohn, se mostrèt esmogut e diguèt qu’èra un gèst que poiriá dobrir de nòvas perspectivas a la relacion entre las doas religions.
 
En Norvègia la comunautat josieva es fòrça petita e nonmàs manten dobèrta la sinagòga d’Òslo. Los atemptats de París e Copenaga amb l’aument de las agressions contra d’edificis o de cementèris liats a la comunautat josieva an despertat la paur de la renaissença de l’antisemitisme en Euròpa.