Los Oscar, los prèmis mai mediatics e glamoroses de l’indústria cinematografica estatsunidenca, an agut un ganhant clar: lo filme Birdman, d’Alejandro González Iñarritu, que s’es impausat sus un autre filme que concorriá, Boyhood, de Richard Linklate. Birdman a obtengut los Oscar del melhor filme, del melhor director, del melhor scenari original e de la melhora fotografia per Emmanuel Lubezki. The Grand Budapest Hotel (La Granda Ostalariá Budapèst) a obtengut tanben quatre figurinas, mas en categorias tecnicas: melhora benda sonòra d’Alexandre Desplat, melhor dessenh de produccion, melhor abilhatge e melhor maquilhatge e melhora confadura. E Boyhood se deu solament conformar amb lo prèmi de la melhora actriz segondària, Patricia Arquette.
 
L’Oscar de la melhora actritz èra mai previsible: Julianne Moore, per Still Alice. Lo del melhor actor es anat a Eddie Redmayne, per The Theory of Everything, la biografia d’Stephen Hawking.
 
Whiplash a obtengut doas figurinas per de causas tecnicas: lo melhor montatge e la melhora sonorizacion. L’Oscar del melhor filme de lenga non anglesa es anat al polonés Ida, de Pawel Pawlikowski. De son costat, Big Hero 6 a complit lo pronostic e a ganhat l’Oscar del mehor filme d’animacion. La figurina del melhor documentari l’an donada a CitizenFour. Fin finala, l’Oscar de la melhora cançon s’es atribuit al tèma Glory, del filme Selma, sus la vida de Martin Luther King, interpretada pel cantaire John Legend.
 
 
Lo discors revendicatiu de Patricia Arquette
 
L’actritz Patricia Arquette, premiada amb l’Oscar de la melhora actritz segondària per son ròtle dins lo filme Boyhood, a fach un discors revendicatiu. Al delà dels mercés protocollaris, Arquette n’a profechat per revendicar l’egalitat entre los òmes e las femnas, en protagonizant un dels moments mai aclamats de la gala. “Es arribat lo temps que i aja l’egalitat sociala e de salaris per las femnas als Estats Units e dins tot lo Mond”, çò a dich.