Exumaràn l’enfanton que moriguèt lo 7 de febrièr al Centre Espitalièr Universitari de Tolosa, après una operacion de las amigdalas e de vegetacions. Una autopsia es prevista en seguida d’una enquèsta judiciària que lo procuraire de la Ciutat Mondina l’a dobèrta a la demanda dels parents. Los parents an fach lor denóncia per “omicidi involontari”.
 
“Es fòrça dur per nosautres de far nòstra denóncia contra un espital e contra de mètges que salvan de vidas cada jorn, mas las circonstàncias an fait que i siam obligats”, çò diguèt lo paire als mèdias. De fach, çò que la familha planh es la desconeissença absoluda de la causa de la mòrt, que los quites mètges la raportèron pas.
 
L’enfanton, de 21 meses d’edat, subiguèt una operacion presentada pels mètges coma “benigna” e tot se passèt plan. Mas quand la maire li anèt far lo poton après l’operacion, a la sala de revelh, remarquèt que la boca e lo nas del drollichon èran plens de sang. Moriguèt après quatre jorns en essent dins lo còma.
 
De son costat, l’espital declarèt lo 19 de febrièr que l’enfant aviá “presentat de complicacions cirurgicalas e anestesicas grèvas” sens detalhar las circonstàncias de la mòrt, mas en assegurant que “i a pas agut cap de fauta medicala ni dins l’organizacion de la presa en carga”.
 
Segon Le Figaro, semblariá qu’après lo començament de l’emorragia, lo personal medical amaguèt la vertat als parents durant los quatre jorns que seguiguèron l’operacion. Los mètges aurián afirmat que l’enfant èra en còma artificial e que “se pausava”, mentre qu’en realitat èra a morir. Segon l’avocat de la familha, los mètges amaguèron als parents que l’enfanton èra clinicament mòrt.
 
“Ai esperat, esperat, perque m’an fait esperar!”, çò planhiá la maire que se disiá “en colèra”. “Ai perdut mon filh unic e sabèm pas perqué! Voldriái saber perqué es mòrt a 21 meses, èra a la gardariá per enfants, en plan bona santat malgrat sas petitas otitis e rinofaringitis”.