Doas personas executadas per “aver d’afars amb los curds”. Los jihadistas menan a tèrme una ofensiva dins la val de Khabur, al costat de Cizîre. La milícia assiriana (MFS) e la curda (YPG) combaton amassa per far recular los islamistas.

L’Estat Islamic (EI) a raubat almens 90 crestians assirians al costat de Cizire, lo mai oriental dels tres parçans que forman lo Curdistan Occidental (estat sirian). Lo raubament s’es debanat dins la val de Khabur, ont los islamistas comencèron ièr diluns una ofensiva contra las fòrças que defendon lo parçan.
 
Segon l’Observatòri Sirian dels Dreches Umans (SOHR), almens 56 assirians son estats raubats a Tal Shamiram, çò meteis que s’es passat amb de “dotzenats d’assirians” a Tala Hermez. La meteissa font ditz que l’EI a executat doas personas a Ghibsh pel fach d’“aver d’afars amb los curds”.
 
Lo setmanièr Newsweek ditz que lo mond raubat pòdon èsser mai de 100, e afirma que l’EI a demandat a las fòrças curdas de liberar de presonièrs islamistas en escambi de daissar en libertat los assirians.
 
L’agéncia assiriana AINA rapòrta que, dins l’ofensiva, l’Estat Islamic a destruch divèrsas glèisas assirianas, dont lo temple de Mar Bisho (fotografia). Los jihadistas an incendiat, totjorn segon AINA.
 
Lo parçan de Cizîre es defendut per las milícias curdas de las YPG e las YPJ e per la milícia assiriana del Conselh Militar Sirian (MFS). L’MFS reconeissiá abans ièr que l’Estat Islamic a conquistat divèrses vilatges dins la val de Khabur, e que lors fòrças, aliadas amb las YPG, la polícia assiriana (lo Sutoro) e un grop de gàrdias locals, combaton los islamistas per qu’avancen pas pus.
 
Podètz veire una mapa detalhada de Khabur, amb los vilatges ocupats per l’EI, sus aqueste ligam.
 
L’atac de l’EI a Khabur arriba un jorn après que las YPG e l’MFS menèsson a tèrme una ofensiva dins la region de Tala Hamis, tanben al costat de Cizîre, çò qu’obliguèt los jihadistas de se retirar de 22 localitats.
 
 
Una installacion d’80 ans d’istòria
 
Los assirians s’installèron dins la val de Khabur dins los ans 1930. Se tractava de familhas qu’èran estadas expulsadas de la region d’Hakkari, en lo Curdistan del Nòrd (estat turc). Abans la guèrra actuala, s’estimava que la populacion assiriana a Khabur èra d’aperaquí 20 000 personas. L’installacion principala es Tal Tamir.
 
D’autres territòris del Curdistan Occidental an tanben de populacions assirianas mai petitas, en i comprenent la vila de Qamishli. En 2014, las autoritats de Cizîre declarèron l’assirian lenga oficiala del parçan amb lo curd e l’arabi.
 
 
 

---

Aquesta nòva es adaptada de Nationalia amb qui Jornalet a un acòrdi de cooperacion.