Amnestia Internacionala (AI) denóncia de violéncias policièras e la practica del percaç de refugiats en França. Segon lo rapòrt que l’organizacion umanitària publiquèt ièr dimècres 25 de febrièr, “mai d’11 000 personas foguèron expulsadas del país de genièr fins a octòbre de 2014”. E mai se mençona qu’a qualques expulsats lor ofriguèron de lotjaments alternatius, que “la majoritat de las familhas deslotjadas las recebèron pas”. Coma exemple citan los 400 expulsats a Marselha lo 18 de junh passat, qu’entre eles “sonque 18 familhas recebèron de lotjaments alternatius”.
 
Los autors del document soslinhan que mai de 19 000 personas vivon dins 429 campaments non oficials, segon de donadas de 2015. La majoritat d’eles son de gitanos de l’èst d’Euròpa e dels Balcans. Çò pièger, es que segon AI, “las autoritats acomolan pas las informacions suls crimes d’òdi contra los immigrants illegals”, e mai denóncia que “prenon pas en compte los motius de discriminacion al moment d’enquestar sus los afars”.
 
Aquel rapòrt tanben explica que lo quite François Hollande declarèt en octòbre de 2013 que 500 refugiats sirians serián lotjats en França en 2014. Mas lo 27 de març la polícia arrestèt 85 sirians que “recebèron pas la possibilitat de sollicitar l’estatut de refugiat e òm lor donèt pas qu’un mes per quitar França”.
 
La situacion de Calais, qu’en octòbre i aviá 2 500 immigrants e refugiats provenent d’Afganistan, Etiopia, Eritrèa e Siria, se destaca per sas marridas condicions umanas. La majoritat dels immigrants e refugiats pensavan d’anar al Reialme Unit. Lo govèrn francés obliguèt aperaquí 700 personas a quitar lors abitanças e encara a l’ora d’ara s’es pas fach cap de centre de lotjament.
 
 
Chepic per las violéncias policièras
 
L’organizacion umanitària manifèsta de preocupacion per la manca d’“exaustivitat e imparcialitat” de las enquèstas sus las violéncias policièras. Remarca qu’en 2014 s’enquestèt aperaquí sus 1000 cases, que mantes son encara en cors d’investigacion. L’afar s’illustra amb la ZAD del Testet, al Sivens, ont lo jove tolosan Rémi Fraisse moriguèt a causa d’una granada lançada per la polícia.
 
 
Una situacion catastrofica dins lo Mond
 
A respècte de la situacion mondiala, AI soslinha que mai de 50 milions de personas son desplaçadas en demandant refugi, dont mantes son abandonats als grops armats. Ditz que la situacion es catastrofica, e qu’en 2015 pòt aquò venir pièger perque la reaccion de la comunautat internacionala es minimalista
 
Se critica los crimes de l’Estat Islamic, e de violacions grèvas dels dreches umans per las autoritats d’Afganistan, Kenya, Nigèria, Paquistan, Russia, Turquia e Iraq.