Polemica dins l’estat espanhòl après la publicacion dels contenguts de la matèria de religion dins las escòlas, qu’en aplicacion de la darrièra Lei de l’ensenhament, coneguda coma Lei Wert, l’a prepausada la Conferéncia Episcopala, es a dire, los evesques espanhòls.
 
Fins ara, la matèria aviá nom “religion”, èra facultativa e i explicavan las valors de las religions del Mond. A partir d’ara aurà nom “religion e morala catolica”, serà encara facultativa mas serà avalorada amb una nòta e ajudarà a la majoritat dels escolans per aver una nòta mejana mai nauta. Totas las escòlas de primària deuràn ofrir aquela matèria.
 
La matèria cèrca de mostrar la relacion entre Dieu e l’òme, e mai d’ensenhar l’istòria biblica e dels Evangèlis en tot explicar l’evolucion de la Glèisa Catolica e de la crestianetat dempuèi sa fondacion fins a l’actualitat. Qualques capítols de la matèria son “la creacion coma present de Dieu”, “l’òme, òbra mèstra de la creacion” o “lo pòble d’Israèl coma depositari de la sapiéncia de Dieu”.
 
En primièra annada de primària los escolans seràn ja avalorats a travèrs de la memorizacion e reproduccion de “formulas simplas de demanda e de mercés”. S’i ensenharà tanben los espacis e tempses liturgics. En tresen annada, per exemple, se tractarà l’accion missionària e caritativa de la Glèisa e se coneisserà las vidas e òbras dels sants, en mai d’aprene lo sens de la pregària del Nòstre Paire. En quatrena annada de primària s’introduirà los concèptes de pecat e de perdon.
 
En segondària l’escolan deurà aprene a far la diferéncia entre las explicacions teologica e scientifica de la creacion o entre l’òme e los animals. S’i ensenharà tanben la dignitat de totas las personas, amb l’independéncia de lors capacitats psicofisicas o socialas, e s’introduirà los concèptes de la fe, la Trinitat e l’Esperit Sant. Atanben, se prepausa que de grops d’escolans dessenhen un plan de collaboracion amb l’escòla per resòlver de problèmas.
 
Dins aquela estapa, tanben se vòl que los escolans sàpian l’origina e las diferéncias dels divèrses libres sagrats e que perpensen sus la dolor e la mòrt. Per contra, solament un dels quatre blòcs de la quatrena annada fa referéncia a las autras religions monoteïstas per las comparar amb lo catolicisme.
 
Malgrat totas las criticas recebudas, lo tèxt publicat pel Bulletin Oficial de l’estat espanhòl ditz qu’aquela matèria “a pas cap de tòca catequistica o d’endoctrinament”.
 
 
Refús en Catalonha
 
E mai se la polemica es venguda dins tot l’estat espanhòl, las associacions de parents e escolans de Catalonha an criticat aquela matèria. Considèran qu’es una “doctrina” e que se “deuriá ensenhar dins las glèisas e non pas dins las escòlas”. E mai, fan una crida a las familhas per qu’inscrigan pas lors enfants dins aquel “catequisme involucionista”.
 
De son costat, la conselhièra de l’ensenhament de la Generalitat de Catalonha remembrèt que l’escòla catalana es laïca, “es la sola de tot l’estat qu’es definida aital”. Per ela, e mai se “la religion deu èsser presenta en l’educacion de las personas, perque fa partida de lor formacion integrala”, lo “catequisme se deu far a la parròquia e non pas a l’escòla”.
 
Sus l’aplicacion de la lei en Catalonha, la conselhièra espèra “que la glèisa catalana aurà una vision mai pròcha de la realitat sociala”, çò diguèt.
 
 
Los evesques malcontents per la reduccion d’oras
 
De lor costat, la conferéncia dels evesques espanhòls critica la matèria perque ditz que se’n fa un tractament insufisent. Critican que las classas sián reduchas a 45 minutas e que las Comunautats Autonòmas ajan lo darrièr mot. Planhon que los collègis e licèus ajan drech d’ofrir pas aquela matèria, e dison que comprenon pas la polemica. Segon eles, la matèria es ben confessionala mas es pas una doctrina.