Lo 21 de febrièr passat se debanèt a Tolosa una manifestacion contra las violéncias policièras e per las dichas “zònas de defendre” (ZAD), coma n’es per exemple la del Testet a Sivens, que lo 25 d’octobre passat i moriguèt lo jove tolosan Rémi Fraisse, victima d’una grenada lançada per la polícia.
 
Segon qualques mèdias, aperaquí 500 personas manifestèron amb un resultat violent: 15 policièrs ferits e 17 manifestants interpelats. Se rapòrta pas lo nombre de manifestants ferits. Pasmens, nòstres collègas de La Setmana foguèron sus plaça. Segon çò que rapòrtan, “la manifestacion comencèt dins la calma. D’incidents se debanèron al nivèl de la Plaça Esquiròl ont los policièrs se serviguèron de gases lacrimogèns. Après recomençar lo passacarrièra, d’autres afrontaments se debanèron al nivèl del palais de justícia ont la polícia se serviguèt de canons d’aiga per escampilhar los manifestants”, çò rapòrta La Setmana.
 
 
La Setmana parlèt amb los manifestants
 
Segon lo setmanièr occitan, los manifestants “volián tanben protestar contra la repression policièra puèi que considèran que son las provocacions de las fòrças de l’òrdre que faguèron mal virar las manifestacions passadas. Acusan encara los pròbarratge d’èstre infiltrats per l’extrèma drecha”. En mai d’aquò, los zadistas de la zòna del Testet, a Sivens, demandan de sosten.
 
La còla de La Setmana parlèt amb qualques manifestants e enregistrèt qualques àudios, que los a partejats amb Jornalet. A l’ora d’ara lo chepic màger dels zadistas, al delà de la construccion del barratge, es de poder demorar sus plaça. E mai se contunhan de poblar l’endrech organizats, la justícia lor impausa d’evacuar la zòna.