Dimenjada de violéncias a Sivens (Galhaqués) sul sit ont se vòl construire una restanca contestada pels movements ecologistas. Sus plaça demòran dempuèi longtemps un grop de personas que protèstan amb la tòca de n’empedir la construccion. Mas aquesta dimenjada son estats interpelats per un grop d’agricultors pròrestanca al mièg de fòrtas tensions e d’escambis de còps de ponh. Los zadistas an bastit tres còps una barricada que los agricultors an destruch tres còps. Ochanta gendarmas son estats mandats sus plaça e son a blocar dempuèi dissabte los dos principals accèsses al sit. “I aviá tròp de mond aqueste matin per que poguèssem assegurar la seguretat, e avèm recebut l’òrdre de daissar pas intrar degun”, çò indiquèt un policièr a l’AFP.
 
“Volèm far pression sus l’Estat e metre fin a una zòna de non-drech”, çò declarèt a l’AFP Roland Legrand, president dels Joves Agricultors de Tarn. De lor costat, los zadistas an publicat un comunicat en disent que son “fòrça inquiets tocant lor capacitat de nosença fisica [dels agricultors pròrestanca], e la propaganda que son capables de far circular via lor sindicat agricòla, a qualques elegits e a la premsa locala”. Los zadistas dison tanben qu’an avertit la prefectura.
 
Divendres se reünirà lo Conselh General del departament de Tarn per arbitrar entre doas solucions privilegiadas pels expèrts: una version aleujada de la restanca o tres petitas restancas lateralas. Es una reünion que los zadistas qualifican de “mascarada per ganhar de temps abans las eleccions” departamentalas, e profetizan que “se prendrà pas cap de decision” mas qu’o daissaràn en mans de l’administracion que vendrà.
 
 
Projècte en suspension
 
A l’ora d’ara l’òbra se tròba en suspension après que la Comission Europèa lancèsse en novembre passat una procedura d’infraccion contra l’estat francés per violacion de las directivas environamentalas.
 
Mas de fach lo conselh general del departament de Tarn aviá ja decidit de suspendre sine die los trabalhs, après la mòrt de Rémi Fraisse. Totun la ministra francesa de l’ecologia, Ségolène Royal, assegurèt qu’una òbra seriá facha.
 
De fach, la mòrt de Rémi Fraisse portèt la crisi al govèrn francés. Las nombrosas susmautas que se son debanadas per tot l’estat francés, en seguida de la mòrt de l’estudiant de botanica en mans de la polícia, crèan un grand desaise dintre lo poder politic.
 
 
Crisi dins l’estat francés
 
Lo govèrn francés a ensajat de reglar la mòrt del jove tolosan en enebissent l’usatge de las granadas e en suspendent los trabalhs del barratge, e en ensajant de criminalizar los ecologistas en lucha. Mas un larg sector de la societat, los movements ecologistas e los partits d’esquèrra demandan la demission del ministre de l’interior, Bernard Cazeneuve, que se limitèt a dire que i auriá “de sancions se de fautas se son comesas”.
 
Fraisse foguèt tuat dins l’encastre de la repression d’una protèsta populara e pacifica contra la construccion d’una restanca dins la zòna umida del Testet, a Sivens (Galhaqués).
 
 
Lo projècte
 
La restanca prevista, d’un milion e mièg de mètres cubes d’aiga, negariá una partida de la Val de Tescon, en tot far desaparéisser 13 ectaras de zòna umida e en fasent desaparéisser un milion d’animals salvatges (de granhòtas, de peisses o de salamandras). Lo conselh general de Tarn cita lo Ministèri francés de l’Environament, segon lo qual la restanca auriá de vertuts ecologicas, cercant un “equilibri idrologic” de la zòna. Los ecologistas o creson pas, s’opausan al projècte e denóncian qu’es finançat per de fonzes publics per favorir solament d’interèsses privats. Revendican la preservacion de totas las 35 ectaras de zòna umida menaçadas per la restanca. Denóncian que la tòca del projècte es de favorizar l’agricultura intensiva e que, per tant, es un perilh per un centenat d’espècias “protegidas” dont cinc son ja declaradas menaçadas.
 
Segon lo conselh general de Tarn, la restanca es indispensabla per irrigar las tèrras agricòlas e se recrearà una autra zòna umida. Los opausants denóncian un projècte car que solament servirà a irrigar las tèrras d’un petit nombre d’esplechaires que practican l’agricultura intensiva.
 
L’occitanisme s’es mostrat majoritàriament contra la construccion de la restanca, levat lo Partit de la Nacion Occitana (PNO) e l’associacion lo Clusèl (que participèt lo 15 de novembre a una manifestacion en favor de la restanca).