Dimenge 1r de març, l’editorial de Jornalet nos expausava lo bilanç moral dels tres ans de vòstre jornal en linha. Puèi que nòstra associacion ajuda al finançament d’aqueste mèdia, ven a ieu, coma president dels Amics de Jornalet, de vos presentar un bilanç economic nòu, realizat per nòstre clavaire, Terric Lausa. Lo 28 de febrièr de 2015, nòstra situacion financièra, despuèi lo començament de nòstra activitat a la fin de 2013, èra aquesta:
 

 

Nòstre budget es en equilibri, o donam quasi tot a Jornalet, levat de còstes necessaris coma la banca e lo corrièr, e ja vos pòdi precisar qu’aqueste mes de març, bailarem 500 èuros a vòstre jornal.
 
Doncas, nos restarà sonque 200 èuros, çò es, pas gaire de moneda. I a doncas una necessitat absoluda que se renovèlen las adesions. Ara per ara –e aquò explica la diferéncia qu’auretz vista entre lo nombre d’escotissons e lo nombre de sòcis–, sonque uèch personas, que grandmercejam de còr, an pagat una segonda adesion a nòstra associacion. Ben sabi, evidentament, que de membres aderiguèron devèrs lo mitan o la fin de l’annada 2014, mas es important d’oblidar pas que nòstre budget, estrechament associat al de Jornalet, es fragil, qu’avèm de besonh de vòstra apièja per foncionar.
 
Per aiçò vos convidam a renovelar vòstre escotisson, tre qu’o poscatz. Per o facultar, la bona nòva es qu’en mai dels pagaments per chèc o viraments bancaris, ara tanben podètz mandar vòstre sosten financièr per PayPal, coma o podètz veire sus la pagina de nòstra associacion!
 
Ansin Jornalet contunharà de créisser, nos aprocharem de l’objectiu del desen vòt de Jornalet per 2015: 100 sòcis dels Amics de Jornalet!
 
E tanben nos serà mai simple d’organitzar de rescontres entre Jornalet e sos lectors...
 



Gerard Joan Barceló