Dimècres 18 de febrièr espeliguèt en DVD, VOD e Blu-ray lo filme francés Samba que foguèt difusat als cinèmas occitans a partir del 15 d’octòbre passat. Dempuèi divendres passat, 27 de febrièr, es sortit lo filme als cinèmas de Catalonha, siá doblat en catalalan, siá en version originala sostitolada en catalan.
Lo filme conta l’istòria d’un rescontre entre Samba Cissé, un immigrat senegalés en situacion administrativa illegala que viu a París, e Alice, una trabalhaddicta que se suènha d’un burn-out en militar dins una associacion de defensa dels despapierats.
Los actors Omar Sy (Intocables, De l’autre costat del periferic) e Charlotte Gainsbourg (Un se’n va, l’autre demòra; Antichrist; Melancholia) jògan amb elegància, emocion e naturalitat. Los dos personatges, pauc a pauc, aprendràn a se conéisser, a conéisser la realitat de la vida de l’autre darrièr las aparéncias. Aprendràn a se presar, a se rejónher. E tot aquò se passa del temps que Samba lucha per se poder trapar un permés de sejorn en França. Vertadièrament lo filme s’ancora a l’excelléncia d’aqueles dos comedians.
Los directors Eric Toledano e Olivier Nakache (Intocables, Nòstres jorns aüroses) an volgut mostrar la vida de cada jorn dels immigrats en situacion illegala, una vida de paurs, de patricòts, d’entreajudas, de precarietats e tanben una vida de grands moments de generositat, d’umor e d’amor. An reüssit a fargar una òbra plena de pudor e d’emocions.
Los actors segondaris, Tahar Rahim (Un profèta) e Izïa Higelin (Marrida filha), tanben son impressionants per lors jòcs esmovents e tot en sinceritat. Un es un clandestin argerian que se fa passar per un brasilièr ja que pensa qu’aquò fa mai simpatic e l’autra es una avocata militanta dels dreits dels clandestins.
Aqueste filme balha un vejaire suls immigrats en general e suls immigrats despapierats en particular qu’es car al mieu còr. Mòstra de gents umanas, prigondament umanas, luènh de totas las cinicas consideracions estatisticas o politicas. Aqueste filme es una potinga redobtabla contra lo racisme. Es un prètzfach d’utilitat publica. Òm ne sortís lo còr leugièr e plen d’amor. Es un filme que cal veire. Òc, es un filme qu’absoludament cal veire.
TL
Samba, d’Éric Toledano e Olivier Nakache, amb Omar Sy, Charlotte Gainsbourg, Tahar Rahim e Izïa Higelin - França 2014 - 120 minutas - Gaumont
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
I a pas cap de comentari
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari