Dempuèi lo 26 de genièr s’es assajat a la preson del Mont de Marsan (Lanas Petitas) una iniciativa nomenada “modul respècte”, inspirada del modèl espanhòl. Lançada jos l’impulsion de la directritz interregionala dels servicis penitenciaris, Sophie Bleuet, e del director de la preson landesa, André Varignon, s’espèra qu’aquel modèl s’estendrà a d’autras presons del país.
 
Segon çò que rapòrta Le Figaro, lo sistèma es destinat a luchar contra las violéncias carceralas e a apasimar la tension que se produtz entre las personas enpresonadas. Aquel sistèma se basa sus l’autonomizacion e la responsabilizacion dels detenguts, lor permet de circular fòra lors cellulas dins d’oraris mai largs, de 7h30 a 12h15 e de 13h15 a 19h. Los dorsièrs se seleccionan e se seguisson cada setmana per una còla pluridisciplinària compausada per de conselhièrs penitenciaris d’insercion e probacion e de psicològs. De lor costat, los presonièrs devon adoptar un comportament exemplar e participar a 25 oras d’activitats per setmana, jos pena d’exclusion.
 
Bleuet explica, encara segon Le Figaro, que lo sistèma permet de preparar d’activitats culturalas e esportivas, e tanben de preparar lo projècte professional dels detenguts. Los representants del pòl emplec son tanben associats al projècte e de partenaris qu’ofrisson de formacions mai especializadas, per exemple dins lo domeni de l’ecologia. De mai, fòra las activitats impausadas, los presonièrs an drech d’accedir a las salas d’espòrt, a la biblioteca e tanben a las salas informaticas per avançar lors recèrcas d’emplec.
 
Lo dispositiu es encara recent, mas segon Bleuet los resultats son bons, e mai se lo representant de la CGT, Ludovic Motheron, a declarat a l’AFP qu’aquel equilibri serà pas de bon retrobar dins las presons de la region parisenca.