Bamako signa la darrièra proposicion argeriana per un acòrdi de patz, mas contunha de refusar la demanda de la Coordinacion dels Movements d’Azawad, que vòl que Mali venga un estat federal. Lo document prevei la creacion d’assembladas regionalas en tot Mali. Los movements azawadians demandan de temps per consultar la proposicion “amb las basas e las populacions”.

Lo govèrn de Mali a acceptat qu’Azawad siá “una realitat umana, sòcioculturala, memorativa e simbolica partejada per diferentas populacions del nòrd”. Es lo primièr còp dempuèi que comencèt lo conflicte d’Azawad en 2012 que Bamako signa un document amb aqueles tèrmes: fins ara, la posicion oficiala del govèrn malian èra d’acceptar pas lo nom Azawad —defenduda per los autonomistas, federalistas e independentistas azawadians— per designar aquel territòri del nòrd de Mali.
 
La frasa en question se tròba dins una proposicion d’acòrdi de patz presentada la setmana passada per la mediacion argeriana al govèrn de Mali e a las doas coalicions politicomilitaras d’Azawad. Una de las doas coalicions —la Coordinacion dels Movements d’Azawad, CMA— amassa quatre organizacions autonomistas, federalistas e independentistas e demanda un “estatut especific” per Azawad. L’autra —la Plataforma— reünís d’unionistas.
 
Lo govèrn de Mali e la Plataforma an acceptat de signar lo tèxt presentat per Argeria. Delà la reconeissença d’Azawad coma “realitat”, lo tèxt prepausa la creacion d’assembladas regionalas en tot Mali, que seràn dirigidas per un president, dins los dos cases elegits per sufragi popular. Aquelas assembladas auràn qualques competéncias —que se son pas determinadas— e recebrián fins al 30% dels budgets estatals.
 
Ça que la, la proposicion argeriana pren pas en compte la demanda del Movement Nacional per la Liberacion d’Azawad (MNLA), membre de la CMA, que vòl que Mali venga un estat federal format de doas unitats federadas: Azawad al nòrd e Mali al sud. Del tèxt se’n destaca pas tanpauc que Mali accèpte de crear una assemblada unica per tot Azawad, ja qu’optariá puslèu per d’assembladas per caduna de las províncias.
 
Azawad ocupa las províncias de Gao, Tomboctó, Kidal e una part de Mopti, e es poblat sustot per de berbèrs toarègs, d’arabis, de songhais e de puls. Los federalistas e los independentistas son mai que mai sostenguts per qualques grops toarègs e arabis.
 
 
La CMA demanda de temps per o consultar “amb las basas e las populacions”
 
La CMA demandèt dimenge mai de temps per consultar lo document prepausat per Argeria amb “las basas e las populacions” d’Azawad. Sens lor consentiment, l’acòrdi a paucas possibilitats d’èsser aplicat sul terren”, çò diguèt la Coordinacion.
 
Segon l’agéncia amazigh Siwel, la setmana passada se debanèron divèrsas manifestacions a Kidal, Menaka e Ber en protèsta contra la proposicion argeriana. Los manifestants reclamèron que se tornèsse a la taula de negociacions e que los movements azawadians acceptèsson pas cap d’acòrdi que comprenguèsse pas, almens, la conversion de Mali en estat federal.

 
 
 

---

Aquesta nòva es adaptada de Nationalia amb qui Jornalet a un acòrdi de cooperacion.

---

De legir sus Tamazgha.fr: “LesTouaregs rejettent les accords d'Alger” e “Langue de bois : Fabius et le vrai faux accord d'Alger !”