Dempuèi lo 1r de març es intrada en vigor en China una nòva regulacion d’Internet qu’enebís los noms d’usatgièrs, escaisses o avatars qu’atempten contra “la seguretat e la sobeiranetat nacionala” [valent a dire estatala] e que “subvertiscan lo poder de l’estat, o que viòlen la Constitucion o las leis”, segon çò que rapòrta Nationalia. Aquela mesura a entraïnat de criticas perque se crenh qu’aquela regulacion s’emplegarà per empedir Internet de parlar dels conflictes nacionals de Tibet, del Turquestan Oriental o de la Mongolia Interiora.
 
Dins aquel sens, l’Associacion dels Pòbles Menaçats a dich qu’aquela regulacion, mesa en practica, “permetrà la criminalizacion sistematica de las minoritats etnicas e religiosas” pr’amor que, desenant, se pòt punir tota persona que “publique e difonda sul ret d’informacions suls problèmas e conflictes dins las zònas de poblament dels tibetans, oigors e mongòls”.
 
De son costat, l’estat chinés assegura que las criticas se basan sus l’incompreneson. Dins aquel sens, l’agéncia Xinhua ditz que la tòca “es pas de restrénher la libertat d’expression”, mas d’“assegurar que se publiquen pas d’informacions falsas” o “que s’empleguen pas de noms d’un biais fraudulós”, dont los noms dels caps politics del Mond e de las agéncias oficialas chinesas. E mai afirma que las criticas se basan sus un “prejutjat que dura dempuèi longtemps”.
 
Segon Reuters, las companhiás chinesas d’Internet an ja escafat mai de 60 000 comptes d’usatgièrs perque se conformavan pas a la regulacion.