La Val d’Aran es una de las tres melhoras destinacions toristicas del Mond, segon los World Legacy Awards (Prèmis de l’Eiretatge Mondial) que National Geographic liurèt ièr a Berlin, en Alemanha, dins l’encastre de la fièra toristica ITB.
 
Aqueles guierdons destacan las destinacions, organizacions e entrepresas que trabalhan dins la transformacion de l'indústria toristica en desvolopant lo torisme durable. Aran es arribat a la finala dins la seccion destination leadership (primautat dins las destinacions), que guierdona las melhoras practicas dins la proteccion de la natura e la cultura, e mai la destinacion que trabalha amb los vesitaires per los sensibilizar a la proteccion de l’environament. La Val d'Aran passèt una primièra seleccion de 150 candidats e una segonda d’entre 15, e es arribada a la finala en tot èsser una de las tres melhoras destinacions. Aruba a ganhat lo primièr luòc.
 
La candidatura d’Aran als World Legacy Awards èra presentada per Torisme Val d’Aran, un organisme public-privat entre lo Govèrn d’Aran e las entrepresas del país. An mostrat qu’ Aran es una destinacion toristica fòrça populara, d’ivèrn e dins las vacanças d’estiu, gràcias a son ric patrimòni cultural e natural, a la preservacion de la lenga occitana e las tradicions. Tanben an soslinhat que Torisme Val d’Aran encoratja los vesitaires a prene consciéncia de la conservacion de la biodiversitat e que trabalha amb los cercaires de la fauna per protegir las espècias indigènas, especialament amb un projècte de recuperacion de l’ors brun europèu e del pavés (aquel aucèl que tanben li dison pava-sac, pol d’abrana, faisan gavòt, “pavon” —localament en aranés paom—).