La Banca Centrala Europèa (BCE) comença uèi son programa de crompa massissa de deute, segon çò qu’aviá anonciat la setmana passada son president Mario Draghi. Francfòrt prevei de crompar 60 miliards d’èuros per mes fins a setembre de 2016, o delà, se l’inflacion sortís pas pas del contraròtle. Draghi anoncièt tanben las nòvas previsions economicas per l’Eurozòna, que se melhoran a respècte de decembre. La BCE prevei una creissença de l’1,5% per ongan e de l’1,9% per l’an que ven, çò qu’es un melhorament significatiu a respècte de l’1% o l’1,5% previstes a la fin d’arunan. La BCE pronostica una inflacion del 0% ongan, de l’1,5% l’an que ven e de l’1,8% en 2017.
 
Lo programa de crompa de deute injectarà mai d’1 bilion d’èuros a l’economia de l’Eurozòna, a travèrs de la crompa mesadièra d’aperaquí 60 miliards d’actius. Pasmens, Draghi soslinhèt que las mesuras anonciadas per la BCE requerissián tanben d’accions “fermas” dels govèrns, mai que mai tocant las reformas estructuralas.
 
“Per aténher lo maxim de beneficis de las nòstras politicas monetàrias, d’autres airals devon contribuir de manièra decisiva”, çò diguèt Draghi dijòus passat en  una conferéncia de premsa en Chipre. Manifestèt que i aviá pas de “marge per la complasença” e que los estats devián trabalhar per “aumentar l’investiment, afavorir la creacion d’emplecs e melhorar la productivitat, amb l’implementacion ferma de reformas del mercat professional e d’accions per melhorar l’ambient entrepresarial”. Segon Draghi, es “crucial” que las reformas estructuralas s’apliquen “rapidament, de manièra cresabla e efectiva”.