Aqueste divendres, après que lo conselh general de Tarn a decidit de cambiar lo projècte de la restanca de Sivens per una autra proposicion d’òbra mai petita, lo prefècte del departament a donat l’òrdre d’evacuar lo sit ont los zadistas campavan dempuèi novembre 2013 per protestar contra lo projècte inicial.
 
Segon un comunicat dels zadistas, eles decidiguèron de quitar lo sit al moment de conéisser la decision del conselh general de Tarn, ja qu’aquela decision ditz que se farà pas lo projècte contra lo qual los zadistas an protestat longtemps. Es aital qu’ièr a 11h45 comuniquèron qu’abandonavan lo sit, çò es, 15 minutas abans que lo prefècte n’ordenèsse l’evacuacion. Pasmens avián demandat doas condicions: l’amnestia pels inculpats e lo remborsament dels degalhs de material qu’an fach las fòrças de l’òrdre e los pròrestanca violents. Mas lo ministre francés de l’interior, Bernard Cazenave, donèt sul pic l’òrdre de deslotjar lo sit, quitament en metent quinze activistas en gàrdia a vista.
 
Segon d’informacions de Le Monde, tres cents gendarmas entornegèron la zòna en i penetrant per lo sud. Trobèron mai d’un zadista encadenat. Un quinzenat mai d’activistas entornejavan una tomba simbolica de Rémi Fraisse e los quatre darrièrs zadistas resistissián sus un mirador a dotze mètres de nautada, e lor evacuacion durèt mièja ora. Lo quinzenat de zadistas detenguts poirián èsser enseguits per resisténcia a l’autoritat. Los gendarmas desplacèron quitament una còla cinofila per s’ocupar dels cans dels activistas, en prevesent que los animals poguèsson defendre lors mèstres.
 
Cal remembrar que la lucha per preservar la valor ecologica del Testet a provocat un mòrt del costat dels ecologistas, lo jove tolosan Rémi Fraisse, que moriguèt la nuèch del 26 al 27 d’octòbre a causa d’una granada lançada pels gendarmas.
 
Per ara, poiriam dire que la lucha que los zadistas an menat dempuèi novembre de 2014 a ben capitat. Lo conselh general de Tarn a decidit de far pas la restanca prevista. Ara prepausa de far una restanca mai pichona.
 
Per aquesta dimenjada se son anonciats d’acamps de protèsta per tot lo país, en sosten als activistas detenguts.