Dins los ans 1950 e 1960, se revoltèron las comunautats negras dels Estats Units contra la segregacion, las violéncias racistas del Ku Klux Klan e la manca de respècte de lors dreches civics. Ansin, en Alabama, ancian estat confederat pendent la Guèrra de Secession estatsunidenca, lo governador George Wallace, del Partit Democrata, aviá blocada l’inscripcion dels negres sus las listas electoralas: sonque 300 de 15 000 avián capitat a s’i enregistrar. Tanben, dins lo meteis estat, aviá provocat l’indignacion la mòrt de l’activista Jimmy Lee Jackson, lo 26 de febrièr de 1965, picat per de policièrs, qu’un d’eles tanben li aviá tirat dessús.
 
Pr’amor d’aquò s’organizèt, lo 7 de març, amb lo pastor batista Martin Luther King, una marcha de protèsta de Selma a Montgomery, la capitala d’Alabama. 600 militants dels dreches civics dels afroamericans volguèron caminar pacificament mas, al Pont Edmund Pettus de Selma, la polícia e l’armada lor bloquèron lo passatge amb de gas lacrimogèn e de calòssas. I aguèt fòrça ferits, almens 60, demest los quals 17 foguèron espitalizats, e la violéncia de la reaccion policièra indignèt tant l’opinion publica qu’aquel jorn recebèt dins la memòria collectiva l’escais de Bloody Sunday, “lo Dimenge Sagnós”.
 
La seguèron doas autras marchas. Una, lo 9, s’arrestèt al meteis pont; de segregacionistas piquèron a mòrt un activista blanc, lo pastor unitarian-universalista James Reeb. Per l’autra, que comencèt lo 21 e s’acabèt lo 25 a Montgomery, Martin Luther King e los autres organizaires poguèron enfin obténer la proteccion federala dels caminaires. Pasmens, l’impacte del Dimenge Sagnós èra ja estat decisiu: tre lo 15 de març, lo president estatsunidenc Lyndon Johson prepausèt al Congrès una lei de garentida del drech de vòte pels afroamericans, que foguèt efectiva en agost de la meteissa annada.
 
50 ans puèi, la primièra marcha de Selma rèsta un episòdi essencial de la lucha dels negres per l’egalitat, e d’un ponch de vista mai universal, un modèl per totes los que refusan lo racisme e l’injustícia que la patís una comunautat umana.