Mai de dos cents jornalistas de 32 païses son amassats en Aran dempuèi dissabte passat e fins a dissabte que ven dins l’encastre del 62n Rescontre Internacional del SCIJ (Club d’Esquí Internacional dels Jornalistas). Aqueste eveniment se celèbra cada an dins un endrech desparièr e ongan o fan en la Val d’Aran en escasença del 50n anniversari de l’estacion d’esquí de Vaquèira-Beret. L’estacion qu’aculhís l’eveniment n’a fach un sit web qu’es tanben en occitan.
 
Los participants son pas forçadament d’especialistas en jornalisme esportiu, bòrd que i participan los qu’escrivon e los que fan de television, de ràdio o quin que siá tipe de mèdia, dins las tematicas socialas, culturalas, economicas o toristicas.
 
A la ceremònia d’inauguracion participèron las principalas autoritats del Govèrn d’Aran, que convidèron los participants a conéisser e far conéisser aquel petit país occitan.
 
Pendent tota la setmana, los jornalistas an una seguida d’actes programats que lor permet de combinar lo léser amb la descobèrta del país.
 
Cal soslinhar que la jornalista aranesa Anna Geli ganhèt las competicions del rescontre de fa dos ans en Lombardia de manièra absoluda, en tot véncer las femnas de totas las categorias e mai los òmes.