Se dins certans espòrts multiplican las pregàrias e romavatges per veire pas qu’un solet ensag o un solet gòl dins la partida, es pas brica lo cas al rugbi de XIII. Sufís de s’assetar dins los estadis, d’esperar, de bramar un pauc e de picar de las mans a las realizacions nombrosas e supèrbas de las formacions en preséncia.
 
 
Una partida se comença a l’ora
 
Dissabte, a Brutus, ont los Dracs catalans recebián los Diables Roges de Salford, per ara darrièrs en Superliga, se vegèt 14 ensages. De darrièrs plan estranhs, que passavan quatre còps, e tròp aisidament, la linha catalana dins lo primièr quart d’ora: 22-0. Los Sang e Aur jogavan a la velocitat d’una còla que seriá a digerir l’absorcion d’una olada, d’una cargolada e d’un topin de crèma catalana aprèp la pujada de nuèit e dins la nèu del Canigó! Mas Zeb Taïa, puèi Vincenç Duport, escartats per la passa magica de Todd Carney, marcavan. Puèi Ben Pomeroy preniá a contrapè la defensa anglesa: 22-18 a la pausa.
 
La corsa-perseguida repreniá al retorn dels vestiaris. Un tres contra un catalan se transformava en intercepcion, amb la corsa d’80 mètres e l’ensag pel pianenc Teo Fages, lo jove mesclanha dels Diables. Pomeroy replicava. Lo mèstre de jogar dels Roges Rangi Chase trapava un trauc novèl dins la defensa catalana. Miquèl Oldfield sautava mai naut que l’oposicion e marcava sus una passa al pè de Scott Dureau: 32-32. Los Dracs èran ara mèstres del terren: Whitehead marcava, Henderson s’escapava al ras del tengut: 40-32 pels locals. Todd Carney èra victima d’un placatge de retardament: una costèla tocada, mas l’arbitre broncava pas. Los angleses tornavan a 40-38. Candela sus la darrièra palma, Morgan Escarré la recupèra, escapa al placatge advèrs, torna partir. L’arbitre decidís qu’auriá degut jogar lo tengut. Penalitat mai que generosa e, sus la còrna, egalitat 40-40 entre las doas formacions.
 
Los catalans pagan atal las abséncias defensivas e Fraissinós i serà de 500 liuras d’emenda per aver criticat l’arbitre dins la conferéncia de premsa. Doas partidas complicadas espèran los Dracs a Hull: contra Hull KR dimenge, puèi contra Hull FC lo divendres 20 abans la recepcion de Leeds lo 28 de març.
 
 
Los Lapinons e los Pols son en forma
 
En NRL australiana, se jogava la primièra jornada de la competicion. Los campions 2014, los Lapinons, son en forma e passan 36-8 als Broncos a Brisbane. Los Pols, qu’an perdut Sonny Williams e Casty, ganhan 28-4 contra los Vaquièrs de Queensland Nòrd.
 
Ongan, un còp de mai, serem pas decebuts per la competicion australiana.
 
 
Tolosa en mièja finala del Campionat
 
Cordelada d’ensages tanben aqueste dissabte en fin de vèspre a Tolosa: 9 amb 8 transformacions pels locals que baton 52-8 los Dragonets. Lo Tolosa Olimpic s’assegura atal la qualificacion dirècta per las mièjas finalas del campionat.
 
Dimenge, dins lo dèrbi audenc, Carcassona tenguèt totjorn a distància lo vesin lesinhanés per s’impausar fin finala 38-22, en particular mercé a l’arrièr-farfadet Luke Towers. Cada esquipa ne gardèt jols pès per la partida de dimenge que ven en Copa.
 
La segonda plaça serà doncas siá pels Dragonets, siá per l’AE Carcassona. Las doas formacions se rescontraràn dins una quinzenada en tèrra catalana.
 
Aprèp la victòria de Limós contra Palau (28-9) e l’egalitat entre Vilanuèva e Avinhon (24-24), lo primièr torn dels barratges a la debuta d’abril deuriá veire las oposicions Avinhon-Palau e Limós-Vilanuèva.
 
 
Mièjas finalas de la Copa
 
Aquesta dimenjada se jogaràn en país audenc las mièjas finalas de la Copa Lord Derby: Dragonets-Avinhon dissabte a Lesinhan, e lo dèrbi audenc Carcassona-Lesinhan dimenge a Limós.
 
D’ensag en ensag, los Lapinons defendràn coma cal lor títol de campions de l’NRL australiana.
 
 
 
 
Alan Roch