D’amazighistas del Mond entièr an fach una crida a manifestar aqueste dissabte que ven a París, a 15 oras, davant l’Assemblada Nacionala, per refusar l’acòrdi d’Argièr, que lo considèran una umiliacion e una “mascarada presentada coma «acòrdi de patz»”. Lo jornal berberista Tamazgha denóncia “l’acarniment de l’aliança internacionala antitoarèga, e a son cap França e l’estat argerian, per far plegar lo pòble toarèg e lo despossedir de sa sobeiranetat”. Las politicas antiaberbèras ben conegudas de l’estat argerian butan los toarègs a pèrdre fisança en la legitimitat de la mediacion d’Argeria.
 
Lo conflicte armat entre los toarègs d’Azawad e l’estat malian esclatèt en genièr de 2012. En abril d’aquel an, los rebèls azawadians proclamèron la liberacion completa d’Azawad après contrarotlar las vilas de Tomboctó e Gao. L’armada de Mali, vencuda, poguèt pas afrontar l’avançada d’aquel Movement Nacional per la Liberacion d’Azawad (MNLA). Sul pic apareguèron sus scèna de grops islamistas que volián prene lo poder en Azawad, e en seguida França i mandèt l’armada. L’intervencion militara francesa foguèt contestada pels toarègs. E mai se son eles los principals enemics dels jihadistas, los toarègs refusavan una guèrra que se menava “en nom de l’integritat de l’estat malian e contra los dreches dels pòbles”. Mas l’interès principal de França seriá, probable, d’assegurar lo contraròtle sus las minas d’urani del sossòl del nòrd de Nigèr.
 
Lo conflicte d’Azawad per son independéncia se deviá acabar amb l’Acòrdi de Patz del 1r de març 2015 a Argièr, après qualques meses de negociacions. Aquela darrièra proposicion argeriana per un acòrdi de patz seriá acceptada per Bamako mas es refusada per Coordinacion dels Movements d’Azawad. Lo document prevei la creacion d’assembladas regionalas en tot Mali e una petita autonomia per Azawad. Los movements azawadians demandan de temps per consultar la proposicion “amb las basas e las populacions”.