Silvio Berlusconi se prepara per tornar en primièra linha dins la politica italiana. L’èx-primièr ministre italian foguèt ièr absolgut dins l’afar Rubygate, que se l’i acusava d’abús de poder e d’incitacion a la prostitucion de menor. “Il Cavaliere” se reüniguèt ièr a Roma amb de membres del sieu partit, Anem Itàlia (Forza Italia), per ensajar de recuperar son influéncia e preparar lo retorn a la politica.
 
La Cort Suprèma de Cassacion italiana confirmèt la senténcia qu’aviá ja dicha lo Tribunal d’Apelacion de Milan l’estiu passat. Mas aquel tribunal l’aviá condemnat fa dos ans a sèt ans de preson, perque lo considerèt colpable de manténer de relacions sexualas amb la joventa Karima Al Marugh, mai coneguda coma Ruby, quand ela aviá pas encara los 18 ans. Lo procès s’es esperlongat près de quatre ans.
 
“Es una jòia, solid, mas tanben me dòl de pensar que las causas serián estadas fòrça desparièras se ieu foguèsse pas estat victima d’aquela òrra persecucion”, çò diguèt Berlusconi en aprene son absolucion.