La còla de l’emission occitanofòna de France 3, Viure al País, es a far una seguida de reportatges ont analisan, departament per departament, quala es l’accion de l’administracion per l’occitan. La tòca d’aquelas emissions es d’alertar sus la diminucion de las subvencions, e de còps lor supression.
 
Los 22 e 29 de març que venon se farà l’eleccion departamentala en França tota. Aquela eleccion, en vertut del cambiament de la lei realizat en 2013, adòpta qualques cambiaments a respècte de las eleccions precedentas. Se causirà la totalitat dels conselhièrs departamentals e lor mandat serà per sièis ans. L’eleccion cantonala s’atròba suprimida e los nòus conselhs seràn de conselhs departamentals, e pas pus generals coma fins ara. En consequéncia, se vei ja que i a pas tròp de cambiaments e qu’es solament una question de maquilhatge.
 
Pasmens, la nòva distribucion, e mai l’aprobacion de la lei de la nòva organizacion territoriala que reduirà lo nombre de regions, s’apondon al chepic general de la diminucion de ressorsas per la lenga occitana. Dins aquel sens, lo 6 de febrièr passat, l’Associacion dels Elegits Occitans mandèt una letra als deputats per los interpelar sus la situacion de las lengas nacionalas, dichas “regionalas”, dins l’estat francés.
 
 
 
 

---

Los reportatges se pòdon veire en linha sul sit del programa nomenat “Lo blòg de l’occitan”