Blocatges problematics e feblas subvencions n’an acabat amb las emissions de fotbòl en occitan a Niça. Ràdio Niça Pantais [escrivon Nissa Pantai] es pas estada autorizada a comentar lo rescontre Niça-Gwengamp que se debana uèi aqueste 13 de març. En mai d’aquò, dempuèi lo 3 de decembre passat, la ràdio niçarda pòt pas assegurar de dirèctes perque la companhiá Orange, que gerís las connexions Internet de l’estadi Allianz Riviera, demanda 800 èuros per sason, e aquò lo budget d’una ràdio associativa permet pas d’o pagar.
 
Lo director de la ràdio niçarda, Cristòu Daurore, se sentís “pròpri decebut de non poder assegurar aqueste servici public unic: tot comentar en niçard un rescòntre d’un espòrt popular es una magnifica revalorizacion de la lenga d’òc de Niça”, segon çò que ditz en un comunicat qu’a mandat als mèdias. “Reconoissi que fogueriam pròpri ambiciós per la nòstra lenga, li vorgueriam donar una plaça digna, au nivèu dei lengas que s’impauan a nautres coma lo francés e l’anglés”, çò ditz.
 
Ràdio Niça Pantais se creèt en 2008 e tre alavetz emetèt en occitan amb accent niçard e alpenc, e cada dimenjada comentava en dirècte l’encontre de fotbòl de l’esquipa de Niça en occitan. Aquela emission èra assegurada per cinc charraires passionats del fotbòl, dont sempre dos èran a l’estadi de Niça per far lo comentari: Renat Anfosso, Ciril Joanin, Jonatan Santilli, Olivier Pasquetti e Cristòu Daurore.
 
Pasmens, podètz escotar encara las emissions mejançant la ràdio numerica terrèstra, sul sit web de Ràdio Niça Pantais. Tanben se pòdon escotar sus iPhone o Android.