Coma l’an passat, s’organiza una Korrika, çò es, despuèi 1980, una corsa festiva e revendicativa per la lenga basca a Tolosa. Coma o vos expliquèrem, la Korrika s’arrèsta pas per la nuèch e la bandieròla passa de man en man. Lo testimòni es fach amb un baston de fusta talhada, que se sèrva despuèi la primièra edicion amb la bandièra basca. Al davant de la marcha, lo pòrta pendent un quilomètre una persona o associacion que “crompa los quilomètres” per bailar una ajuda economica.

La Korrika , promoguda per l’associacion d’euskaltegis (escòlas de basco) AEK, se fa dins tot lo Bascoat, mas ongan es ja lo tresen còp que s’organiza tanben dins la Ciutat Mondina. Se prevei tanben de sensibilizar a nòstra lenga occitana.

La corsa a luòc dissabte 14 de març a 16h picantas, al Capitòli, qu’es a l’encòp lo ponch de partença e d’arribada. Segon la pagina Facebook de l’eveniment, las activitats començan de matin, a las onze, amb d’entresenhas e un colorament dels numèros dorsals. A las doas de la tantossada, se fa un pica-nica a la Daurada.