Ariane Lumen es una artista peiregòrda qu’evòca l’estetisme, las colors, lo plaser e los subjèctes tant universals coma contemporanèus. Pinta, fa de creacions artisticas e es modèl. Lumen retranscriu d’un biais ludic e interrogatiu aqueste mond, ont segon ela totes daissam una traça e mai se ne prenèm pas consciéncia plenament.
 
L’an 2010 marquèt una evolucion dins la carrièra d’Ariane Lumen: venguèt musa de l’escultor e pintor bulgar Jivko Sedlarski que consagrèt cinquanta tablèus a l’artista occitana.
 
Son percors artistic es semenat d’exposicions, sovent tematicas. Ariane Lumen a expausat a Seol, a l’illa de la Reünion e sustot a Praga.
 
 
Los Ectoplasmas
 
Los Ectoplasmas que crèa dempuèi novembre de 2014 anóncian un nòu virament de l’artista que i tròba sa libertat. Amb aqueles Ectoplasmas experimenta lo desir d’un verai espaci de creacion e de libertat de creacion, ont i pas de constrencha.
 

fffff		fffff
	“Los Ectoplasmas d’Ariane Lumen son pas una espècia demièg las autras. Cèrcan una plaça dins la civilizacion, vòlon aver una existéncia geografica. Refusan d’èsser de non-luòcs. Ela los vòl ligats a la naissença e a la mòrt. Determinan l’encastre que l’espècia umana i pren plaça al sen d’una ierarquia qu’evita lo caos. Son espaci ritual fa aparéisser lo començament e la fin, lo naut e lo bas, l’abans e l’après, lo digne e l’indigne. Règnan en mèstre sus las mila e una nuèches dels sultans insultants amoroses d’una princessa rebèlla que tesquèt e destesquèt aqueles fils de sang, de lum e de tenèbras dins de supèrbas sèrias de far estrementir totes los eròis de legenda. I cresi.”   Maryse Laroque (decembre de 2014)