En seguida de l’erupcion d’un volcan sosmarin, en decembre e genièr passats, emergiguèt de las aigas de l’archipèla de Tònga, en l’Ocean Pacific, una nòva illa (vidèo). Se nomena Hunga Tonga-Hunga A’pai e sos primièrs vesitaires i son anats, malgrat la perilhositat del sòl, e n’an publicat qualques fòtos.
 
Gianpiero Orbassano, proprietari d’una ostalariá en Tònga, i anèt amb dos amics sieus lo 7 de març passat. Pogèron al luòc mai naut de la nòva illa que fa un quilomètre e mièg de long e que se tròba a seissanta quilomètres de Nuku‘alofa, la capitala de Tònga. Segon çò qu’expliquèron, la superfícia èra encara cauda e i a un lac amb una fòrta odor de sofre al centre.
 
E mai s’es una illa pro granda, los expèrts preveson que desapareisserà jos l’aiga de l’ocean dins qualques meses.