Los maximals accionaris de la Banca Privada d’Andòrra (BPA), que representan lo 82% del capital social, publiquèron dimenge un comunicat per demandar a l’Institut Nacional Andorran de las Finanças (INAF) d’organizar una reünion de tot lo sector bancari per fin de resòlver la crisi originada per l’afar BPA. L’accionariat vòl que se prenga las mesuras necessàrias per “preservar los interèsses dels clients, los emplecs dels salariats e lo patrimòni de l’entitat”.
 
Los accionaris dison que respèctan lo procès qu’entreprenguèt lo govèrn andorran quand intervenguèt dins l’entitat. Pasmens, defendon la solvabilitat de la BPA e l’onorabilitat dels salariats. Defendon que los professionals que trabalhan amb “esfòrç, dedicacion e estrambòrd dins lo grop bancari BPA” o fan amb “rectitud e onestat”. De mai, demandan a la justícia “de remetre pas en causa l’onorabilitat dels salariats”.
 
 
Lo director general a disposicion del jutge
 
D’un autre costat, lo director general de Banca Privada d’Andòrra (BPA), Joan Pau Miquel Prats, qu’es un dels encargats mai nauts, passèt dimenge de ser a disposicion del jutge après èsser detengut lo maxim de temps que permet la lei del país. Lo dirigent intrèt dins l’Alcaldia —lo tribunal d’Andòrra— en veitura après mai de quaranta uèch oras d’arrestacion. Joan Pau Miquel Prats es acusat d’un delicte continú d’emblanquiment de capitals venent del crime organizat.
 
L’operacion policièra contra lo presumit emblanquiment de capitals de la BPA rèsta dobèrta e es possible que i aja mai de detencions. Segon lo Diari d’Andorra, la polícia a dos òrdres d’arrestacion de mai contra de gerents de l’entitat —un òme e una femna— per relacion amb lo sistèma corromput.
 
Man drecha de la familha Cierco, proprietària de Banca Privada d’Andòrra, Joan Pau Miquel Prats èra director general de l’entitat dempuèi mai de vint ans e es acusat d’aver emblanquit d’argent de la ret de l’òme d’afars chinés Gao Ping, en preson provisòria e fòrtament restacat al crime organizat.
 
Segon de fonts policièras mençonadas per La Vanguardia, recebèt, almens tres còps, senglas valisas amb 100 000 èuros venent de l’organizacion de Gao Ping a travèrs de l’avocat Rafael Pallardó. Pallardó sembla qu’ajudèt a evasir près de 70 milions d’èuros, la majoritat depausats dins de comptes andorrans. Tanben se supausa que BPA seriá darrièr l’emblanquiment de capitals de la màfia russa —mejançant Andrei Petrov—, del cartèl mexican de Sinaloa e del govèrn de Veneçuèla.
 

L’origina de l’escandal
 
L’escandal se desvelèt fa una setmana, en seguida d’un comunicat de la FINCEN, la division dels delictes financièrs del Departament del Tresaur dels Estats Units, qu’acusava BPA d’aver permés d’operacions per emblanquir l’argent del crime organizat internacional. “Pendent d’annadas, de nauts encargats de BPA an facilitat de transaccions en nom d’emblanquidors d’argent qu’agissián per d’organizacions criminalas transnacionalas”, çò disiá la FINCEN. E desvelava que BPA aviá ofèrt “una ajuda substanciala” a Andrei Petrov, Gao Ping e a qualques nauts encargats del govèrn de Veneçuèla resident en Panamà.
 
En una mesura sens precedents dins l’istòria financièra del país, lo govèrn d’Andòrra decidiguèt d’intervenir immediatament dins l’entitat e destituiguèt l’endeman passat tot lo conselh d’administracion. Lo cap de govèrn en foncions, Toni Martí, insistiguèt per dire: “Es un cas de marridas practicas e i a pas una situacion de risc de solvabilitat ni de problèmas de bilanç. Lo mond pòdon èsser tranquils”.
 
Andòrra a paur que l’escandal BPA pòsca afectar negativament lo sector financièr —que representa près del 20% de l’economia del país— e lucha per manténer lo bon imatge del Principat. Una de las primièras consequéncias foguèt la rebaissa de la qualificacion del crèdit d’Andòrra de la part d’Standard & Poor’s.
 
E mai se l’agéncia saludèt las decisions presas fins ara pel govèrn andorran, l’anóncia facha per las autoritats estatsunidencas sus BPA crèa d’incertituds tocant l’avenir del país.