Alsàcia vòl pas desaparéisser lo 1r de genièr de 2016, quand s’aplicarà la reforma territoriala francesa e quand la region germanofòna farà partida d’una macroregion amb Lorena e Champanha-Ardena. Dins aquel sens manifestèron dimenge un milièr de personas per carrièras a Estrasborg, segon çò que rapòrta L’Alsace.
 
 
127 000 signaturas per un referendum
 
E mai, de partits e d’associacions alsacianas ensajan d’obténer fins a la fin de març 127 000 signaturas, çò es lo 10% dels electors alsacians, per demandar un vòte sus l’avenir d’Alsàcia, segon çò que rapòrta Nationalia.
 
Promogut per la Federacion Democratica d’Alsàcia (FDA), los signataris demandan un referendum ont se pause la question seguenta: “Se desiratz que la region d’Alsàcia sollicite l’estat per experimentar una nòva organizacion territoriala pròpria a Alsàcia?”
 
Segon los movements que sostenon la peticion, amb la desparicion d’Alsàcia coma region oficiala se metrà en perilh son identitat çò qu’afectarà lo desvolopament economic, social e cultural. Es pr’amor d’aquò que demandan qu’Alsàcia venga una collectivitat territoriala amb un estatut especial coma ja o es Corsega.