Dins sos ochanta ans, lo cònsol de Vença, Christian Iacono, compareguèt diluns per lo tresen còp a la justícia, aqueste còp a Lion. Es lo tresen còp que Iacono es acusat d’aver violat son felen Gabriel, dins un procès que comencèt en 2000, mas qu’en 2011 faguèt un virament espectaclós: Gabriel se retractèt e diguèt qu’o aviá tot inventat. Lo 18 de febrièr de 2014, après 14 ans de procès, Christian Iacono obteniá l’anullacion de sa condemnacion a nòu ans de preson, e s’ordenava un nòu procès.
 
Christian Iacono e son filh Philippe avián de relacions tibadas e se pelegèron per l’educacion del pus pichon, Gabriel, filh de Philippe. Christian considerava que Philippe èra tròp dur amb lo pichon. Quand Gabriel aguèt 9 ans, acusèt son papet de l’aver violat. Dempuèi lo moment de son arrestacion, Christian Iacono clama son innocéncia.
 
Gabriel Iacono aviá mantengut pendent 11 ans aperaquí l’acusacion contra son papet, Christian, que ditz qu’aquò es lo signe que lo pichon èra manipulat per son paire Philippe. Uèi los tres òmes se parlan pas pus.
 
 
Jutjament a pòrta barrada
 
Ara Gabriel demanda que lo jutjament se faga a pòrta barrada perque lo preferís “dins la tranquillitat e dins l’ambient pus seren possible”. A l’ora d’ara a 24 ans, a un petit enfanton e trabalha coma agent de seguretat dins un magazin. Per contra, lo cònsol de Vença “preferís sens dobte un procès public” per fin que la decision d’aquitament qu’el ne poiriá beneficiar “siá esclairada per de debats publics”.
 
Lo jove Gabriel a declarat als mèdias que prendrà l’audiéncia amb una “cèrta aprension”. L’avocat de Christian Iacono ditz que lo jove “se prepara a traversar un moment extrèmament dificil e dolorós”, perque “tot aquò va metre un pauc mai en evidéncia lo mau qu’a fach e lo mau que van patir cap e cap aquelei que l’an sostengut pendent lo temps de l’acusacion”.
 
Gabriel auriá mentit per “atirar l’atencion” e reünir sos parents a l’entorn d’el. Lo jove, que trobèt lo sosten de son paire, en garrolha amb lo papet, e quitament d’un mètge, mantenguèt sa version fins a la creire, e mai se sentiguèt “de dobtes au segond procès”.
 
Segon Cécile Esmengiaud, filha de Christian Iacono e tanta de Gabriel, que serà ausida per la justícia dins aqueste darrièr procès, “Gabriel a començat a se reconstruire”. A pas pus de relacion amb son paire Philippe, qu’es totjorn estat en conflicte amb son paire Christian. “Foguèt escaudat per dos verdictes de nòu ans de preson, òm es pas jamai seren au 100% dins un afaire ont es la paraula d’un còntra aquela de l’autre”, çò diguèt Esmengiaud.