Lo Likud, lo partit del primièr ministre israelian Benjamin Netanyahu, a ganhat aquesta setmana l’eleccion legislativa en Israèl amb una victòria clara davant la coalicion Union Sionista de Yitzhak Herzog. Fòrça mèdias internacionals atribuisson una part dels vòtes qu’a obtengut Netanyahu al succès d’un vidèo fòrça polemic qu’el publiquèt sus Facebook pendent la jornada electorala. Dins aquel vidèo, Netanyahu mandava un messatge public a sos seguidors de Facebook en los avertir: “Los electors arabis van votar en massa. Los menan las organizacions d’esquèrra”, çò diguèt.
 
Qualques collectius an criticat aquel messatge que considèran xenofòb. “Cap d’occidental gausariá pas far un comentari racista coma aqueste”, çò planguèt la deputada trabalhista Shelly Yachimovich sus son Facebook. “Imaginatz-vos un primièr ministre o president en quina democracia que siá qu’avertisca que lo sieu govèrn es en perilh pr’amor que, per exemple, los electors negres van en massa a las urnas”.
 
Foguèt pas lo sol incident de la jornada. La Comission Electorala Centrala d’Israèl enebiguèt la retransmission en dirècte d’una compareissença que lo primièr ministre voliá ofrir aquel ser, en considerant que s’agiriá un acte de propaganda. En seguida, Netanyahu avertiguèt que contunhariá d’expausar sas idèas. “Degun nos farà pas calar”, çò diguèt.