Lo ministèri francés de l’educacion demandèt ièr als directors dels establiments escolars de “sortir pas los escolans al moment de l’eclipsi”. La tòca èra de prevenir tot risc de lesion oculara en cas qu’un enfant auriá volgut observar lo solelh sens proteccion. Levat dins qualques pauques establiments escolars ont i aviá de sesilhas d’observacion organizadas pedagogicament amb lo material idonèu, la quasi totalitat dels mainatges d’Occitània son estats forçats de demorar a l’interior dels bastiments, tant dins las escòlas mairalas e primàrias coma dins los collègis e licèus. Oficialament i aviá instruccion de baissar los contravents a tres quarts o de tirar las cortinas e de desplaçar los oraris de las pausas recreativas.
 
En luòc de fornir lo material necessari per l’observacion, o d’organizar d’observacions en petits grops guidats pels professors, lo ministèri es estat mai eficaç a far passar d’informacion per embarrar los escolans... e daissar passar un moment unic de plaser e d’educacion.
 
Après aquel eclipsi, caldrà esperar fins al 21 d’agost de 2017 per ne veire un de fòrça parcial. Pr’aquò, pus luènh dins lo futur, lo 12 d’agost de 2026, i aurà un eclipsi que sa zòna de sornura totala serà fòrça près d’Occitània: al Bascoat, en Aragon, en Catalonha e a las Illas Balearas.