Musica electronica experimentau, sons de natura des deth córrer des aigües sosterranhes enquiath parlar des audèths, lums artificiaus, plantes qu’arresponen ath tacte, cants des ancians campanaus aranesi, rotes a partir de còdis QR per diuèrsi pòbles dera Val d’Aran, eca. Era prumèra edicion der Hestivau Europèu d’Arts Numeriques, Dig@ran, installat en Vilac e Vielha principauments, a aufrit –deth 29 de junh ath 8 de junhsèga– disparières activitats relacionades damb es nauères tecnologiques en tot apostar fòrt a nivèu continentau.

Damb er objectiu de “promòir era cultura aranesa a trauèrs de supòrts digitaus” segontes Eric Rella, president dera Associacion Aranesa d’Arts Numeriques, aguesta hèsta internacionau sense precedents a compdat damb era collaboracion de sòcis de Belgica, França, Galas, Itàlia, Girona e Portugal. A més, “auèm ajudat a plaçar ara Val laguens deth marc digitau Europèu”.

“Es pèces des artistes –bèth un damb ancessors aranesi– son creades entara Val d’Aran” remèrque Rella, donques apareishen aportacions locaus de toti es colors: veus dera corau de Bossòst, testimònis de vesins petiti e grani parlant sus eth país aranés, eth pas deth Garona, eca. Un format molt exigent ja qu’”a estat de besonh un materiau tecnologic molt especific”.

Dempús d’aguesta experiéncia, era organizacion plantege ua dusaua edicion “en tot demorar arribar a mès pòbles dera Val d’Aran” entà transméter ua imatge conjunta de tot eth territòri. Eth creishement dera PINC (Platform for Innovative Nomadic Culture), –plataforma ara que pertanh Dig@ran–  a de hèr consolidar eth projècte entà “acuelher mès òbres e capvirar-les en un atractiu toristic entara Val mès enlà deth hestivau”.


Un maridatge entre tecnologia, natura e cultura
 
Entre totes es peces i a agut eth campanau de Vilac –eth prumèr visitable en territòri– a aufrit disparièrs cants cada quinze menutes. A més, auèm sigut testimònis dera creacion dera prumèra campana damb ua inscripcion en aranés. Entre es arbres deth pati dera glèisa de Vilac a agut lòc es massatges sonors a partir de taces, dera man d’ua artista d’estil Rockabilly camin de Marilyn Monroe. As pòrtes de Vielha, er arriu Nere acompanhe es veus en diuèrses lengües de Le Ponton Sonore que dant era benvenguda as visitants  e narren çò que signifique víuer ena Val d’Aran. Dejós der Ajuntament de Vielha er Akousmaflore a animat er entorn damb era polifonia que s’escape d’un jardin de plantes musicaus ar arrespóner ath contacte uman.




Iñaki Delaurens