Se debanèt ièr lo primièr torn de l’eleccion departamentala dins l’estat francés implicant per extension la màger part d’Occitània. Los resultats son pas gaire positius per l’occitanitat en vesent lo gròs resultat qu’obten lo Front Nacional, e mai las divisions qu’an afeblit lo movement occitanista. Dimenge que ven se celebrarà lo segond torn d’aquela eleccion, que poiriá èsser decisiu. Pasmens, quin que siá lo resultat, la situacion actuala de la lenga e la cultura occitanas es pietadosa e, en aprofechant aqueste eveniment, Iniciativa Lengadòc e Calandreta cridan a far “una campanada” d’alèrta. L’idèa es d’organizar de manifestacions per tot lo país, davant la pòrta dels conselhs departamentals, lo jorn que se constituiràn, es a dire lo 2 o lo 3 d’abril segon lo departament.

Iniciativa Lengadòc e Calandreta cridan a manifestar davant la pòrta dels conselhs departamentals del país lo jorn que se constituiràn, e a dire lo 2 o lo 3 d’abril segon lo departament. Se demanda al mond de portar de bandièras occitanas e de campanas o de campanetas per far sonar una campanada d’alarma. “Volèm alertar los elegits del departament e lor dire que se devon metre al trabalh activament e amb eficacitat. Que se devon balhar los mejans d’evitar un desastre cultural a nòstre país. Aital degun poirà pas dire que n’es pas estat assabentat”, çò dison los collectius convocants que creson que cal “lançar l’alarma sus la situacion catastrofica ont se tròban la lenga e la cultura occitanas”.
 
Amb aquela accion, locala e globala a l’encòp, espèran de far una accion mediatica que faga prene consciéncia als nòus elegits de l’importància de salvar “lo patrimòni del departament, del país, un patrimòni viu e istoric”. Dins aquel sens, Iniciativa Lengadòc afirma que “lo patrimòni viu es tant important e fragil coma l’autre patrimòni istoric, aquel qu’es material”.
 
“Refusan de mandar de pompièrs quand crema la selva, qu’es un patrimòni natural?”, çò se demandan los convocants, en tot conclure que las dificultats budgetàrias son pas un argument acceptable. E mai alèrtan que las collectivitats en realitat “òbran contra l’occitan”.
 
“Cap a una situacion de l’occitan qu’es estada declarada per l’UNÈSCO en «grand perilh» la mobilizacion s’impausa, de la basa segur, e tanben de las amassadas territorialas. E a la basa constatam qu’existís una demanda fòrta d’occitan tre que i a una ofèrta de qualitat. Nos en avisam cada jorn dins las escòlas, los balètis, las accions culturalas. A aquesta demanda, las associacions respondon lo mai sovent gaireben solas. Pas cap d’iniciativa de l’estat e una accion dels poders publics qu’es notòriament de mai en mai indigenta, subretot dins l’ensenhament, e quasi nulla dins lo domeni de la cultura. Las collectivitats se devon implicar mai e agir amb determinacion per balhar un avenidor a lor patrimòni, qu’es la riquesa d’uèi e de deman de lor territòri. E la responsabilitat dels elegits es ben, al minim, de transmetre en bon estat a las generacionsa venentas lo patrimòni recebut en eiretatge”.
 
Per mai d’entresenhas podètz escriure a iniciativa-lengadoc@lap....