Trobèron dijòus passat los cadavres de cinc nenons dins un ostal de Loishats (Lana Gran), un dins un sac isotermic e quatre dins lo congelador. Los enfants èran nascuts qualques jorns abans.
 
Tot comencèt quand lo paire descobirguèt al domicili familial lo cadavre d’un nenon dins un sac isotermic. Sul pic l’òme avertiguèt los gendarmas, que trobèron los autres quatre nenons mòrts dins un congelador.
 
La maire es una femna de 35 ans que, segon los gendarmas, los enfantèt tota sola dins l’ostal. L’an mesa en gàrdia a vista e transferida a l’Espital Charles Perrens de Bordèu, ont se somet a d’examens ginecologics e psiquiatrics. Lo ministèri public de Bordèu a decidit de dobrir una informacion judiciària per murtre contra ela. D’un autre costat se faguèt dissabte las autopsias dels nenons mòrts per precisar las circonstàncias de lor naissença e lor filiacion. “Es una enquèsta particularament pesanta e delicada”, çò a manifestat la procuraira a Le Figaro.