Se debanèc dimenge passat era 36u edicion dera Marcha Beret, era prestigiosa corsa d’esquí de hons d’estil classic que combine ara perfeccion eth naut nivèu esportiu damb es amators. Era corsa se reportèc deth 1r de hereuèr passat a causa deth mau temps, es nheuades e eth risc de lauegi. Es 1000 inscriti de hereuèr venguèren 600, totun era Marcha Beret non a quitat d’èster era competicion d’esquí de hons mès prestigiosa d’Occitània.
 
Damb es 600 participants, er eveniment compdèc coma tostemp damb es familhes e es grops d’amics que participen de manèra populara. Era Marcha Beret tanben atrè a participants d’elèit, vengudi enguan de païsi coma Finlàndia, Norvègia, Estònia, Russia, Itàlia e França. Cau soslinhar qu’era corsa ei en laguens deth calendèr Euroloppet de marches populares.
 
Era corsa que prepause 3 distàncies —10 quilomètres, 21 quilomètres e 42 quilomètres— que passen peth Plan de Beret a 1850 mètres de nautada.
 
Era corsa qu’ei promoiguda peth Conselh Generau d’Aran e pera estacion d’esquí de Vaquèira-Beret. Que compde, ath delà, damb era collaboracion dera comuna deth Naut Aran, dera Associacion des Volentaris dera Val d’Aran e d’auti organismes e entitats mès dera Reiau Federacion Espanhòla des Espòrts d’Iuèrn e dera Federacion Catalana des Espòrts d’Iuèrn.
 
 
 
 
FM