Frederic Lacas es lo novèl president de l’Aglomeracion Besièrs-Mediterranèa que compta tretze comunas entre mar e vinha. La collectivitat territoriala s’apièja sus la competéncia en torisme e son estructura, que lo dison l’OTCBM, per desvolopar una manifestacion novèla que met en lutz la cultura occitana. Es lo cantaire lengadocian Joanda qu’es encargat de la direccion e de l’aviament d’aquel novèl eveniment occitan. “Lo país de Besierés es un espaci qu’a un pè dins la Mar Mediterranèa e a l’encòp un pè dins las planas viticòlas. Çò que fedèra aqueste airal geografic es tot çò que lo liga a sa cultura occitana qu’es inerenta al territòri”, çò explica Joanda.
 
A recampat a son entorn de personal per assegurar la logistica, lo secretariat, lo seguiment artistic, la règia generala e tot çò necite per assegurar aqueste eveniment popular e festiu. “Los programas qu’installi se passan per las dotze comunas de l’aglomeracion, levat la vila de Besièrs ont interveni pas, que mon accion es definida per se debanar unicament dins las comunas qu’enròdan Besièrs. La mira es d’obrar en favor del desvolopament de marcadors culturals occitans qu’identifiquen las vilas de l’aglomeracion a destinacion dels toristas especialament, ja que la linha budgetària es aquela de la competéncia en torisme. Ai pres rendètz-vos amb cada cònsol e mai amb totas las fòrças vivas de cada comuna que son las associacions, los fogals rurals, los clubs esportius, las mediatècas, las estructuras publicas, per obrar ensems en sinergia.” 
 
Aital, pendent los meses d’abril, mai, junh, setembre e octòbre, es tota una programacion artistica occitana que recamparà los artistas e lo public a l’entorn de concèrts e cançons, balètis, contes, literatura, teatre, espòrts, jòcs, animals totemics, mercat occitan, estands culturals, especialitats culinàrias, rescontres…
 
Una programacion diversificada, de grand public e de varietat que se pòt adreiçar a un public de proximitat o europèu que ven del nòrd d’Euròpa, d’Itàlia o d’Espanha, dins una region qu’es una de las mai toristicas. La còla de programacion ditz qu’es pas totjorn aisit “de trapar pro de formacions occitanas que son en capacitat de prepausar d’espectacles artistics de varietat. I a una manca a aquel nivèl mas vesèm dempuèi qualque temps d’artistas que començan de seguir aquesta dralha artistica.”
 
Las primièras programacions se faràn tre lo 4 d’abril de 2015 per se clavar lo 24 d’octòbre. Es una manifestacion novèla que serà gratuita, dobèrta a totòm e especialament als 110 000 estatjants de Besièrs-Mediterranèa e fòrça mai en periòde toristic. Lo programa serà disponible sul sit de l’Ofici de Torisme de l’Aglomeracion.
 
 
 
 
LOP