La cercaira tolosana Aurore Avarguès-Weber recebrà deman lo Prèmi del Programa Internacional de la Fondacion L’Oréal-UNÈSCO per las Femnas e la Sciéncia, qu’atribuís de borsas de 20 000 èuros amb la tòca d’encoratjar las joves femnas talentosas “a perseguir lor carrièra scientifica”. La cercaira tolosana, de 31 ans, serà recompensada per sos trabalhs qu’an demostrat que las abelhas an la capacitat de complir de prètzfaches complèxes coma comptar o reconéisser una cara umana, çò publica L’Informatique.
 
Avarguès-Weber a demostrat empiricament dins sa tèsi “la granda capacitat d’abstraccion de las abelhas: sabon comptar e reconéisser una cara”. Se son mesas a l’intrada d’un labirint, la cercaira a observat que las abelhas identifican de signes representats sus una cartografia e que descobrisson regularament la sortida portant lo signe que mena a una recompensa. E mai s’an un cervèl pas mai grand qu’un cap d'agulha, las abelhas son dotadas “d’una bona vision e d’una granda memòria”, çò publica L’Express.
 
La jove scientifica tolosana a remarcat que quand aqueles insectes realizan de prètzfaches complèxes, “los resultats s’observan plan mai rapidament qu’amb de monins”. Atanben a provat que las abelhas son pas unicament guidadas per lor instint e que pòdon “adaptar lor comportament a lor environament e a las experiéncias viscudas”.
 
Ara, l’enjòc per Aurore Avarguès-Weber es de comprene cossí las abelhas realizan de prètzfaches d’aquesta complexitat amb talament pauc de neurònas. Considèra ja divèrsas pistas de reflexion. Dins aquel sens se pausa la question se lor cervèl dispausa d’un metòde mai eficaç que l’òme per tractar las informacions o se seriá possible qu’una meteissa neuròna s’utilizèsse per de foncions diferentas.