La setmana passada, una comission d’enquesta parlamentària japonesa es ‘ribada a la conclusion que la catastròfa de Fukushima es estat creat per l’òme. “L’accident (...) es la resulta d’una ententa entre lo govern, las agéncias de regulacion mai l’operator Tepco e d’una manca de governança de quelas instàncias”. La centrala de Fukushima era pas presta per resistir a un seïsme nimai un tsunami. L’operator Tepco e las autoritats de regulacions sabián qu’era vulnerabla mas an pas prengudas las mesuras necessàrias quitament si avián lo temps de zo far. Emai la comission repròcha a Tepco de pas aver reagir sufisament regde dins las prumieras oras de l’accident. Parlan de problemas estructuraus de l’operator.

Quauques jorns apres qu’un daus reactors de la centrala d’Ohi dins l’oest dau país aia tornat desmarrar, queu rapòrt fai planejar un dobte sus la securitat de las installacions nucleraras japonesas. Per lo professor Kyoshi Kurokawa, los disfoncionaments son mai que mai liats a la cultura japonesa d’obeïssença a l’autoritat mas podem èsser segurs que son universaus. Las recomendacions dau rapòrt son per lo Japon: es a esperar que tots los país que l’energia es fortament nuclearizada aprendràn de quela catastròfa tant per çò tecnic coma per çò organizacionau.




Maime Caillon