Los jogaires del Dalkurd FF, una esquipa de fotbòl formada en 2004 per de refugiats curds de la tresena division suedesa, avián previst de prene lo vòl entre Barcelona e Düsseldorf que s’escrachèt dimars sul Pueg dels Tres Evescats. Après un sojorn a Barcelona, los jogaires d’aquel club devián tornar dimars a Borlänge, mas al darrièr moment decidiguèron de cambiar lo vòl perque la correspondéncia a Düsseldorf èra tròp longa.
 
En luòc de pojar dins l’avion de Germanwings que s’anava accidentar, los jogaires cambièron amb una correspondéncia per Zuric e Munic. “A totes los qu’an ensajat de nos contactar aquestas darrièras oras, ja sèm a l’ostal e anam plan. Èra un autre avion. Que repausen en patz”, çò disiá sul sieu compte de Twitter lo portièr, Frank Pettersson.
 
E lo director esportiu, Adil Kizil, expliquèt al jornal Aftonbladet que se sentissiá fòrça astruc perque l’esquipa deviá aver pres l’avion: “son sortits a l’encòp quatre vòls dirèctes cap al nòrd, e nosautres aviam de jogaires dins tres. Mas pas dins lo que s’es escrachat”.
 
Lo Dalkurd FF de Borlänge se fondèt en 2004 coma una iniciativa sociala adreiçada als refugiats e als immigrants curds. Es conegut en Suècia perque an progressat fòrça en paucas annadas: son passats de l’avantdarrièra division, la setena, a la tresena. Lo club obtenguèt tanben de resson en Suècia, en novembre passat, quand dins una partida los jogaires exibiguèron una bandièra de solidaritat amb la resisténcia curda a Kobanê.
 

 
 
Lo Dalkurd FF es pas la sola esquipa creada e formada per de refugiats del Pròche Orient en Suècia. Dins la vila de Södertälje, amb una importanta comunitat d’assirians dempuèi qualques decennis, i a doas esquipas de la segonda division sorgidas de membres d’aquela comunautat: l’Assyriska Föreningen e lo Syrianska FC.