Qu'ei estat filmat en Varossa, aquera vath deras Hautas Pireneas vesia deth Comenge, dab monde deth país qu'explican se quin aquera societat montanhòla e virava tota ath torn dera fabricacion deth hormatge. Que'u vederatz a hèr ath pè deth huec, dab eths utisses de bèth temps a, eth cafalh e era hormatgèra, qu'enteneratz a parlar de leiton o de purri e que i apreneratz eth sens deth vèrbe "cantejar". Aqueth documentari navèth que vos harà tanben pujar en eths cortaus dera Varossa tà véder se quin trebalh èra de hèr e de conservar eth hormatge aciu-haut. Mès, mèslèu de vos ac condar tot ara, diguem sonque que Tot un Hormatge! ei un moment de partatge dab aqueths varossencs prestits d'umanitat ara lenga shucosa, un moment que vos darà hame de sorríder. E de minjar hormatge? A consomar sense moderacion!

 

Tot un hormatge! que dura 40 menutas. Qu’ei disponible en DVD, dab sostitolatge en occitan o en francés. Entà comandà’u, que’s cau adreçar ath Ostau Comengés per e-mail o per telefon ath +33 (0)5 61 04 49 24. Eth DVD que còsta 15€ (+ 2,70€ de pòrt).

Joan-Pau Ferré