Malika Milhorat es una pintora carcinòla qu’a desvolopat una estetica novèla. Sos tablèus son unics. Los realiza amb de pintura d’òli e amb los pincèls, los cotèls, sus e jos resina, sus de telas o sus de lausas. Abstrachas o figurativas, las telas de Milhorat son percorregudas de movement e rebaton las recèrcas de l’artista sus la matèria que transmet las emocions. L’inspiracion del trach sembla de guidar una òbra sovent figurativa. L’artista del Bas Carcin tròba sa satisfaccion amb los subjèctes de la femna, del caval e de la natura. Pinta sas telas a l’interior de son estudi, en Bas Carcin, mas se desplaça en exterior per reproduire las meravilhas de la natura.
 
Malika Milhorat nasquèt en 1972 e es artista professionala dempuèi 2013. La passion li arribèt tard e mai se la creativitat foguèt apareguda dins son esperit dempuèi qu’èra tota petita. L’artista observava son paire realizar de grands velièrs amb de broquetas, çò que l’impressionava. De fach, a totjorn sentit l’enveja de crear mas i aviá quicòm dins son esperit que la fasiá se sosestimar. Mas en seguida d’un accident de mòto en novembre de 2011, que l’artista deguèt passar qualque temps en cadièra de ròdas, Milhorat perpensèt fòrça pendent qualques meses e se lancèt a l’aiga, o maitot a “l’òli”.