Er iuèrn passat, eth hestivau que presentèc en Barcelona diuèrsi artistes occitans. E aguest viatge en Tolosa s’i son presentadi artistes dera talha de Feliu Ventura, Albert Freixas, Cesk Freixas, Djé Balèti, Primaël e Ester Formos, Adolfo Osta, Xavier Rota e Rafèu Sichel.
 
Es concèrts deth hestivau que sigueren presididi eth tot moment pera plancarda qu’er Ostau d’Occitània hec en diuèrses lengües a prepaus dera manifestacion de condemna deth masèl en ua escòla josieva de Tolosa. E aguest esperit de convivéncia, paratge e dignitat se podec respirar ena plaça Naut Bernat, en un barri deth centre de Tolosa, plen de poblacion nauvenguda, qu’ei vengut simbèu deth mestissatge e dera interculuralitat, e tanben objectiu d’atacs xenofòbi e fascistes. 

 
E atau qu’ei que Tactik Collectif e tota era còlha des “motivés” hèren era produccion tecnica deth hestivau. 
Eth concèrt deth cantaire berbèr Rachid Banallaoua que representaue er esperit deth barri, deth temps qu’era banda catalana de pòp Estupida Ekirah i portaue eth puntet catalan. 

 

E en darrèr moment, quan Mauresca hège a borir ua plaça que dançaue e cantaue es ritmes dub, rap e reggae dera grana banda montpelhierenca, era ploja qu’obliguèc a desmontar e a suspéner eth concèrt d’Ò.K! Brigada Internacionau. 

 


Es brigadistes, sense tot er equipament sonor, mès damb ua qualitat excepcionau que montèren era caisha dera bateria, eth baish, era guitarra, er acordeon, es votzes, flabuta e percussions diuèrses e heren a vibrar mès que jamès er Estanquet dera Portièra, qu’auie ja acuelhut mès d’ua serada pendent eth hestivau. Aires coneishudi per toti, coma Joan Petit o era Immortèla, a ritme de reggae o de salsa, qu’ocasionèren un estrambordant fin de hèsta indescriptible pes qu’auérem eth privilègi que d’èster aquera net en Estanquet. 


 

Que cau díder qu’Ò.K! Brigada Internacionau ei eth grop revelacion deth ‘Sèm e Serem’. S’agís d’ua formacion de musicians occitans e catalans: eth Conjunt Badabad’Òc e es votzes de Carles Belda, Joan Garriga de La Troba Kung Fú, Gigi de Niça des mitiqui Nux Vomica e Stefano de Lou Seriòl, acompanhadi pes valencians d’Orxata Sound System; que hèn ua union explosiva de hèsta e alegror, damb aires que toti coneishem, mès fòrça ben mesclat en dirècte. Era pròplèu escadença entà escotar-los e gaudir-los que serà en Rodés, pendent era Estivada.
 
Se pòt plan arremercar, qu’eth hestau ei hèt damb eth còr, e damb era bona volentat des artistes e des organizaires qu’en tres ans a capitat d’establir ligams e complicitats entre es musicians des dus païsi. Que cau arregraïr eth sosten financèr des hestivaus Barnasants de Barcelona e Estivada de Rodés, qu’an cargat damb mès dera mitat deth pressupòst deth hestivau.
 
‘Sèm e serem’ qu’ei un des hestivaus que merite era complicitat e es sòs des institucions, mès que mès per çò qu’ei de relacions internacionaus, coma er Institut Ramon Llull que nègue sistematicaments es subvencions, segontes planh era organizacion deth hestivau, que tanben considère qu’es ajudes dera municipalitat de Tolosa son plan petites.
 
 
 
 
Ferriòl Macip